Ижтимоий тармоқларда гувоҳлар томонидан тасвирга олинган видео машҳурликка эришмоқда: унда Chery Tiggo 8 да ўтирган Tesla раҳбари Илон Маскни кўриш мумкин. Кроссовер рўйхатга олинган рақамларга кўра, видеодаги ҳолатда Хитой эмас, балки Бразилия тасвирланган — Маск ростдан май охирларида ушбу мамлакатга ташриф буюрганди, Chery’нинг эса бу ерда автомобиль йиғиш корхонаси бор, деб хабар беради Motor.
«Хитой автомобиллари» порталининг аниқлашича, ролик Сан-Паулуда олинган ва Chery заводи айнан шу ерда жойлашган — Хитой маркасининг Жанубий Америкадаги биринчи корхонаси. Заводнинг қурилиш ишлари 2011 йилда бошланган эди, киритилган инвестиция эса 400 миллион доллар. Айни вақтда у ерда Tiggo 2, Tiggo 3x ва Arrizo 6 Pro моделлари йиғилади. Илон Маск ҳаракатланган Tiggo 8 кроссовери ҳам мамлакатда тақдим этилган, Chery Бразилияда жами 9 та моделини йиғади.
Илон Маск Сан-Паулуга май охирларида мамлакат президент Жаир Болсонару билан Амазонкадаги тропик ўрмонлар ҳимояси лойиҳасини муҳокама қилиш учун келган эди. Шунингдек, учрашувда алоқалар, инвестициялар, инновация ва Бразилиянинг иқтисодий потенциалини мустаҳкамловчи илғор технологиялардан фойдаланиш масалалари ҳам кўтарилади.
Бразилияда Chery Tiggo 8 нархи салкам 202 минг реални (41,1 минг доллар) ташкил этади.
Изоҳ (0)