Илон Маск анъанавий равишда Tesla эгаларининг кўплаб саволларига жавоб бериб келади ва яқиндаги суҳбатда у электормобилларда янги — ёмғир вақтида автотураргоҳдаги машинанинг ойналари автоматик ёпилишини таъминловчи функция пайдо бўлишини тасдиқлади. Компания раҳбарининг айтишича, автомобиль функциясида ойналарни автоматик ёпувчи имконият мавжуд, деб хабар беради Motor.
Tesla созламалари ойна ва эшикларни блоклашнинг бир нечта сценарийсини тақдим этади, бироқ у об-ҳаво шароитини ҳисобга олмаган. Walk-AwayDoor Lock номли биринчи сценарийни қулфлар созламаси бўлими орқали фаоллаштириш мумкин — бу ҳолатда ҳайдовчи смартфон ёки брелок билан автомобиль салонини тарк этса, юкхона ҳамда эшиклар автоматик равишда ёпилади. Шунингдек, ёпилмаган ойна ва эшиклар тўғрисидаги телефонга хабарнома келади.
Келажакда электромобилнинг функционаллиги кенгаяди ва тизим об-ҳавони фарқлашни ўрганиб олади. Тахминларга кўра, машина ёмғир ёғишни бошласа, ойналарини автоматик равишда кўтара бошлайди. Бу функцияни Tesla автотураргоҳга қўйилган машинада болалар ёки ҳайвонларни аниқлаш тизими билан бирлаштириши мумкин.
Вақти-вақти билан Tesla автомобилларига ноодатий ва баъзида бемаъни функциялар қўшилиб туради. Масалан, 2021 йилнинг охирида электрокар эгалари машинадан мегафон сифатида фойдаланиш имкониятига эга бўлган. Megaphone номини олган функция ёрдамида салонда айтилган барча гапларни баланд товушда трансляция қилиш мумкин.
Бундан олдин, Tesla Европада ўзининг биринчи заводини очгани, Илон Маск қарийб 6 млрд долларлик Tesla акцияларини хайрия қилгани, Tesla 2021 йилда қарийб 1 миллион дона электромобиль сотгани тўғрисида хабар берилганди.
Изоҳ (0)