Америка махсус хизматлари Украина ҳарбий стратегияси ва режалари, унинг талафотлари ва ҳарбий ҳаракатлар тўғрисидаги бошқа маълумотлар бўйича тўлиқ тасаввурга эга эмас. Бу ҳақда The New York Times (NYT) ўз манбаларига таяниб хабар бермоқда, деб ёзади «Коммерсантъ».
«Америка махсус хизматларида Украинадаги операциялар ҳақидаги маълумот ўзлари истаганидан анча кам, уларнинг Россия армияси, у режалаштирган операциялар, унинг муваффақиятлари ва омадсизликлари борасида кўпроқ тасаввурга эга», — деб ёзади газета разведканинг амалдаги ва собиқ ходимларига таяниб.
Қайд этилишича, бу, хусусан, Америка махсус хизматлари кўпроқ АҚШга душман мамлакатлар, масалан, Россия ҳақидаги маълумотларни тўплашга эътибор қаратиши билан боғлиқ.
Бундан ташқари, NYT ёзишича, Украина ҳукумати, эҳтимол, АҚШга нотўлиқ маълумот етказаётган бўлиши мумкин, масалан, ҳарбий хизматчилар орасидаги ва техника бўйича йўқотишлар ҳақида. NYT манбалари фикрича, бунга бир нечта сабаблар бор. Улардан бири шуки, Украина жамоатчиликка ёки шерикларига ўз заифликларини кўрсатишни ёки уларда Украина ғалаба қозонолмайди деган тасаввур уйғотишни истамайди. Бундан ташқари, Украина ҳукумати йиллар давомида ўз махфий маълумотлари ҳимоясини мустаҳкамлаб келган — уларни бошқа мамлакатлар билан бўлишиш ушбу маълумотлар Россия қўлига тушиб қолиши хавфи остида қолдириш демакдир.
Колумбия университети халқаро алоқалар профессори Стивен Бидл фикрича, Украинада бундай қилиш учун барча асослар бор. «Агар натижа Россиянинг ҳарбий позицияларини мустаҳкамлашга хизмат қилса, украинларнинг ўз талафотлари борасида очиқлиги Америка ёки Украина жамоатчилиги манфаатларига мос келади, деб ўйламайман», — деди у.
Эслатиб ўтамиз, АҚШ Украинадаги вазиятни кузатиш учун сунъий йўлдошлардан фойдаланишни кенгайтиришга қарор қилди. SAR билан жиҳозланган сунъий йўлдошлар ҳар қандай об-ҳавода ва куннинг исталган қисмида катта ҳажмли тасвирларни олади. NRO’нинг ўз қурилмалари бор, аммо улардаги тасвирлар махфийлаштирилган. Уларни махфийликдан чиқариб, маълумотларни иттифоқчиларга узатиш учун жуда кўп вақт керак бўлади. АҚШ ҳарбий-космик разведкаси маълумотлари билан боғлиқ вазият ҳам худди шундай. Хусусий компаниялар олган тасвирлар эса зудлик билан узатилиши мумкин.
Аввалроқ The New York Times (NYT) Қўшма Штатлар Украинага разведка маълумотларини узатаётгани, Киев ушбу маълумотлар ёрдамида Россия ҳарбийларига зарба бергани ҳақида хабар берганди. Ғарбнинг Украинага юбораётган разведка маълумотлари Россиянинг махсус операциядаги мақсадларига эришишига тўсқинлик қилмайди, деди Кремль матбуот котиби Дмитрий Песков бунга жавобан.
Изоҳ (0)