Россиянинг Украинага қарши уруши давом этаётгани сабабли Жаҳон банки Киевга қўшимча 1,49 миллиард доллар ажратади. Бу ҳақда 7 июнь куни ташкилот раҳбари Дэвид Малпасс маълум қилди. Унга кўра, ушбу маблағлар давлат хизматчилари ва ижтимоий соҳа ходимларининг маошларини тўлашга йўналтирилади.
Жаҳон банки сайтида қайд этилишича, лойиҳа Буюк Британия, Нидерландия, Литва ва Латвиядан молиявий кафолатлар олган. Бундан ташқари, ташкилот лойиҳанинг Италиядан параллел молиялаштирилгани ва мултидонорлик траст фонди (МДТФ) томонидан қўллаб-қувватлангани ҳақида хабар берди.
Шу тариқа, Жаҳон банкининг Украина иқтисодиётига ажратган ёрдам пакети 4 миллиард доллардан ошади, бунинг ярмини Киев олган, дейди ташкилот. Жаҳон банки ҳисоб-китобларига кўра, Россия босқини оқибатида Украина иқтисодиёти жорий йилда қарийб 50 фоизга қисқаради.
Украина президенти Владимир Зеленский Россия босқини тугаганидан кейин Украина иқтисодиёти ва инфратузилмасини тиклаш учун ўртача 600 миллиард доллар керак бўлишини айтганди. Май ойи бошида Жаҳон банки Россия босқини оқибатида Украинага етказилган зарарни 60 миллиард долларга баҳолаган. Дэвид Малпасснинг таъкидлашича, бу иқтисодий харажатларни ўз ичига олмайдиган дастлабки ҳисоб, у инфратузилма ва биноларнинг вайрон бўлиши натижасида етказилган зарарни назарда тутади.
Изоҳ (0)