Қозоғистонда расман учта янги вилоят ташкил топди, деб ёзади Tengrinews. Мамлакат президенти 4 майда имзолаган, янги ҳудудларни ташкил қилиш тўғрисидаги фармон 8 июнь куни расман кучга кирди.
Улитау вилояти — ҳудудий жиҳатдан энг йирикларидан бири, аммо иккита туман — Жанаарка ва Улитау ҳамда учта шаҳар — Жезказган, Каражал ва Сатпаевдан иборат. Жезказган — мис саноати маркази – вилоятнинг маъмурий марказига айланди. Янги вилоятнинг аҳолиси сони қарийб 226 минг кишини ташкил этиши керак.
Абай вилояти Шарқий Қозоғистон вилоятидан ажратиб олинган. Совет даврида унинг ҳудудида Семипалатинск вилояти жойлашган эди. Ҳудуд пойтахти сифатида Семей шаҳри белгиланди. Вилоятга саккизта туман (Аксуат, Абай, Аягоз, Бескарагай, Бородулиха, Жарма, Кокпекти, Уржар) ва иккита шаҳар (Семей ва Курчатов) кирди. Вилоят аҳолиси сони тахминан 640 минг кишига тенг бўлиши керак.
Алмати вилояти таркибидан ажратиб олинган Жетису вилояти мамлакатдаги энг кўп аҳолига эга вилоятлардан бирига айланди. У ерда қарийб 650 минг киши яшайди. Вилоят маъмурий маркази Алмати вилоятининг собиқ маркази — Талдикорганда жойлашди. Вилоят саккизта туман ва иккита шаҳарни ўз ичига олди, булар — Аксу, Алакол, Ескелди, Каратал, Кербулак, Коксу, Панфилов, Сарканд туманлари ҳамда Талдикорган ва Текели шаҳарлари.
Шу тариқа, Қозоғистон вилоятлари сони 17 тага етди.
Изоҳ (0)