Молдова собиқ президенти Игорь Додон фикрича, амалдаги президент Майя Санду «ва унинг ташқаридаги хўжайинлари» республикада беқарорликни қўзғатмоқда, деб ёзади «Коммерсантъ». Унинг даъво қилишича, Молдованинг Руминияга ҳарбий ва сиёсий жиҳатдан қўшилиши ҳамда мамлакат ҳудудига НАТО қўшинларини жойлаштиришга тайёргарлик кўрилмоқда. Ўз даъволари нимага асосланганига у аниқлик киритмади.
Додоннинг айтишича, Молдова ва Руминиянинг «техник ва сиёсий-ҳарбий бирлашуви»ни мамлакат фуқаролари фикрларини ҳисобга олмаган ҳолда амалга ошириш режалаштирилмоқда. «Қуролланиш жараёнлари ва Россияга қарши васваса атайлаб, НАТО қўшинларининг Молдова Республикасида бўлиб туришини оқлаш учун уюштирилмоқда. Мамлакатимизнинг бетарафликдан воз кечган ҳолда Руминия ҳудудига ҳарбий ва сиёсий жиҳатдан қўшилишига тайёргарлик кўрилмоқда», — деб ёзди у Telegram’да.
Буюк Британия ташқи ишлар вазири Лиз Трасс май ойида НАТО Молдовага қурол етказиб беришни муҳокама қилаётганини айтганди. Унинг сўзларига кўра, томонлар мамлакат «НАТО стандартлари»га мувофиқ бўлишини хоҳлаяпти. Июнда Молдова Евроиттифоқ мамлакатларидан ўлим келтирмайдиган қурол-яроғ сўради.
Игорь Додон май охирида қўлга олинганди. Кишинёв суди Молдова собиқ президентини 30 суткага уй қамоғига ҳукм қилди. Сиёсатчи пассив коррупция, сиёсий партиянинг жиноий ташкилотдан молиявий ёрдам олиши, ноқонуний бойиш моддалари бўйича айбланмоқда. Унинг ўзи эса унга қарши жиноят иши «геосиёсий мақсадга эга» деб ҳисоблайди.
Социалистлар партияси собиқ етакчиси Игорь Додон 2016—2020 йилларда Молдова президенти бўлган. У россияпараст сиёсатчи ва Владимир Путиннинг тарафдори ҳисобланади. 2020 йилги сайловда у Майя Сандуга мағлуб бўлди.
18 май куни Молдовада мамлакат собиқ президенти ва Социалистик партиянинг собиқ раҳбари Игорь Додонга нисбатан унинг Молдова Демократик партияси собиқ раҳбари Владимир Плахотнюк билан учрашуви акс этган видеотасвир ортидан жиноий иш очилган эди.
Ушбу видео Молдова парламентининг собиқ депутати Юри Ренита томонидан 2020 йилда эълон қилинган. Унда Плахотнюк ва ўринбосари Сергей Яралов Додонга пакет топширади. Ренитанинг таъкидлашича, учрашув 2019 йилда бўлиб ўтган, пакетда катта миқдордаги пул бор бўлган.
Видеода Додон ва Плахотнюк парламентда конституциявий кўпчиликка эга бўладиган коалиция тузишни муҳокама қилади. ТV-8 канали таъкидлашича, Додон «доимий равишда Владимир Путинга қайдлар ёзиб туришини» айтган, аммо уларнинг мазмунига ойдинлик киритмаган.
2020 йил июнь ойида Молдованинг Коррупцияга қарши прокуратураси «жиноят белгиларини» кўрмагани сабаб Додонга қарши иш қўзғатишдан бош тортган эди. Идоранинг тушунтиришича, текширув пакетнинг ичида нима бўлганини аниқлай олмаган, қарор эса қонуний йўл билан тўпланган далилларга асосланган.
Додон Плахотнюкдан пул олганини рад этиб, жиноий иш қўзғатилишини унинг «мамлакатдан қочиб кетиши»га эришиш истаги ва «ҳамма нарса издан чиққан бир пайтда» Молдовадаги муаммолардан эътиборни чалғитишга уриниш билан изоҳлади.
2021 йил декабрида собиқ президент 2008 йилда Молдовани электр энергияси билан таъминлайдиган Energocom иштирокидаги схема ҳамда Иқтисодиёт вазирлиги (ўша вақтда унга Додон раҳбарлик қилган) ёрдамида 12 миллион доллар миқдоридаги ўғирликлар ҳақидаги иш бўйича гумонланувчи деб топилган эди.
Изоҳ (0)