Португалия соғлиқни сақлаш хизматлари мамлакатда маймунчечак билан касалланган 153 кишини рўйхатга олди, деб ёзмоқда «Интерфакс».
Қайд этилишича, касалликнинг барча ҳолатлари эркакларда аниқланган, аксарият ҳолатлар Лиссабонда қайд этилган.
Аввалроқ Жаҳон соғлиқни сақлаш ташкилоти маймунчечак вирусининг одамлар орасида тарқалиши билан боғлиқ вазият пандемия даражасига етмаслигини маълум қилганди. «Аниқ билмаймиз, лекин бундай бўлади, деб ўйламаймиз», — деди ЖССТ чечак дастури котибияти раҳбари Розамунд Льюис маймунчечак пандемияга айланиши мумкинми деган саволга.
Маймунчечак кам учрайдиган юқумли касаллик бўлиб, Марказий ва Ғарбий Африканинг чекка ҳудудларида кенг тарқалган. Унинг белгилари — кўнгил айниши, иситма, тошма, қичишиш ва мушак оғриғи. Минтақадан ташқаридаги ҳолатлар кўпинча эпидемиологик жиҳатдан ноқулай ҳудудларга саёҳат қилиш билан боғлиқ. Вирус контакт орқали юқади, аммо унинг тарқалиш хусусияти паст.
Изоҳ (0)