Қозоғистоннинг асосий қонунига ўзгартиришлар киритиш бўйича референдум натижалари мамлакат тарихидаги бурилиш лаҳзаси бўлиб, у янги давлат қуришни бошлаш имконини беради. Бу ҳақда Қозоғистон президенти Қосим-Жўмарт Тўқаев Саудия Арабистони ташқи ишлар вазири билан учрашувда айтиб ўтди.
«Давлат раҳбари қироллик ташқи ишлар бўлими раҳбарини самимий қутлар экан, унинг ташрифи мамлакатимиз тарихидаги бурилиш даври — умумхалқ референдуми ўтказилган вақтга тўғри келганини, референдум натижалари янги Қозоғистонда бунёдкорлик ишларини бошлашимизга имкон беришини таъкидлади» — дейилади президент матбуот хизмати хабарида.
5 июнь куни Қозоғистонда конституцияга ўзгартиришлар киритиш бўйича референдум бўлиб ўтди. Асосий ўзгартиришлардан бири конституциядан республиканинг биринчи президенти Нурсултон Назарбоевга бағишланган модданинг чиқариб ташланиши бўлди. Тузатишлар қабул қилинса, у шахсий имтиёзларининг катта қисми ва элбоши (миллат етакчиси) мақомини йўқотади. Келажакда унинг ҳуқуқий мақоми собиқ президентлар ҳақидаги амалдаги қоида билан тартибга солинади. Тузатишларда амалдаги давлат раҳбарининг ваколатларини қисқартириш ва унинг яқин қариндошларига давлат хизматчиси лавозимларини эгаллашни тақиқлаш ҳам назарда тутилган.
Қозоғистон Марказий сайлов комиссиясининг дастлабки маълумотларига кўра, асосий қонунга киритилган ўзгартиришларни 77,18 фоиз киши қўллаб-қувватлаган. 11 734 642 потенциал сайловчилардан 7 986 293 нафари овоз бериб, сайловчиларнинг иштироки 68,06 фоизини ташкил қилган. Расмийлар референдумни ҳақиқий деб тан олди.
Изоҳ (0)