Ижтимоий тармоқларда Наманган шаҳридаги «Алпомиш» МФЙда жойлашган хонадонларнинг бирида ёнғин чиққани тасвирланган видео тарқалди. Наманган вилояти ФВБ ҳолат бўйича маълумот берди.
Маълум қилинишича, 7 июнь куни соат 10:00 да «Алпомиш» МФЙ Бураматут кўчасида жойлашган хонадонда ёнғин содир бўлаётгани тўғрисида шаҳар ФВБга хабар келиб тушган. Хабарга кўра 5 та ёнғин-қутқарув экипажи соат 10:12 да воқеа жойига етиб бориб, ёнғин соат 10:20 да қуршаб олинган ва соат 11:10 да ўчирилган.
Ёнғин натижасида бир-бирига туташ қурилган хонадонларнинг тахминан 155 квадрат метр майдонда томи, шифт қисми ва уй-жиҳозлари ёниб, зарарланган. Ҳодиса оқибатида тан жароҳати олиш ва ҳалок бўлиш ҳолатлари қайд этилмаган.
«Ҳозирда ёнғиннинг келиб чиқиш сабаби ва моддий зарар миқдори аниқланмоқда», — дейилади хабарда.
Аввалроқ Тошкентдаги «Райҳон» ошхонасида ёнғин содир бўлгани, Сергелидаги хонадонларнинг бирида ёнғин чиққани тўғрисида хабар берилганди.
Изоҳ (0)