Айни пайтда республикада 164 та олий таълим муассасаси (ОТМ) фаолият юритаётган бўлиб, 2026 йилгача улар сони 200 тага етказилади. Бу ҳақда бугун, 7 июнь куни ўтказилаётган Олий Мажлис қонунчилик палатаси йиғилишида Олий таълим вазири Абдуқодир Тошқулов айтиб ўтди.
Абдуқодир Тошқуловнинг маълум қилишича, ОТМлар ва талабалар сони йил сайин ортиб бормоқда.
«2016 йилда Ўзбекистонда 77 та олий таълим муассаси фаолият кўрсатган ва уларда талабалар қамрови ҳам ҳозиргидан анча кам эди. Айни пайтда ОТМлари сони 164 тага етди. Масалан, ўтган ҳафтада ҳам 2 та университет очилди. 2026 йилгача ОТМлари сонини 200 тага етказиш режалаштирилган. Албатта, улар сони ортса, талабалар ҳам кўпайиб боради. 2017 йилда мен бошқарган Термиз давлат университетида 6 минг нафар талаба ўқирди. 2021 йилга келиб, у ерни 23 минг талаба билан янги раҳбарга топширганмиз. Ҳозирда бу рақамлар 30 минга қараб боряпти. Яъни фаолият кўрсатаётган ОТМларида ҳам талабалар сони 4-5 баробарга кўпайди. Мамлакатда талабалар сони бугун 850 минг нафарга етди. Бу умумий – кундузги, кечги ва сиртқи таълимни қамраб олган рақам. Хусусан, кундузги таълимда 512 минг нафар талаба таҳсил олмоқда» – деди вазир.
Аввалроқ Ўзбекистон ОТМларига қабул квоталарини тасдиқлашга оид қарор лойиҳаси муҳокамага қўйилгани хабар қилинганди.
Изоҳ (0)