Эндиликда истеъмолчилар «Hududgaz.uz» сайти орқали сарфлаган газ харажатларини билиб олишлари мумкин. Бунинг учун онлайн калькулятор ишга туширилди. Энергетика вазирлигининг «Дарё»га маълум қилишича, тизим истеъмол қилинган табиий газ учун амалдаги ва таклиф этилаётган тарифлар бўйича қиёсий ҳисоб-китобларни амалга оширади.
«Бу қулайлик янги жорий этилган «Истеъмолчи» тизимига ҳам татбиқ қилинади. Тизим табиий газ фойдаланувчиларининг шахсий ҳисоб рақамини бошқариши ва онлайн хизматларни олиш бўйича яқин кўмакчи ҳисобланади. Яъни, шахсий кабинет аҳолига янада қулайлик яратиш мақсадида жорий қилинган бўлиб, истеъмолчилар ушбу кабинет орқали бюрократик тўсиқларсиз, бир нечта газ хизматларидан фойдаланиш имкониятига эга. Жумладан, шахсий кабинетдан фойдаланиш учун биринчи навбатда истеъмолчи рўйхатдан ўтиши ва керакли маълумотларни тўлдириши керак. Янги тизимнинг афзаллиги шундаки, агар фойдаланувчида бир нечта шахсий ҳисоб рақам бўлса, уларнинг ҳолатини, шунингдек, барча объектлари учун газ истеъмоли ва тўловларни кузатиб бориши, кунлик, ойлик газ истеъмоли ҳамда қарздорлик ҳақидаги маълумотларни олиши мумкин. Энг муҳими, уйдан чиқмасдан ёки дунёнинг исталган нуқтасидан онлайн тўловнинг кенг имкониятларидан фойдаланган ҳолда, хизматлар учун тўлов амалга ошириш имконияти мавжуд», – дейилади манба маълумотида.
Аввалроқ истеъмолчилар учун электр энергияси сарфини ҳисобловчи онлайн калькулятор ишга туширилгани хабар қилинганди.
Изоҳ (0)