Андижонда пилла қабул қилиш пунктини 180 минг долларга сотишга уринган пиллачилик кластери раҳбари ушланди

Андижон вилоятининг Асака туманида аукцион орқали сотиб олинган пилла қабул қилиш пунктини сотишга уринган пиллачилик кластери раҳбари қўлга олинди. Бу ҳақда туман ҳокимлиги матбуот хизмати хабар берди.

Маълум қилинишича, Асака тумани «Қўнғирот» МФЙ ҳудудида 1,15 га майдонда жойлашган Қўнғирот пилла қабул қилиш пунктининг бино ва иншоотлари «Э-Аукцион» электрон савдо платформаси орқали сотувга чиқарилган. Аукцион натижаларига кўра, «Асака ипаги» масъулияти чекланган жамияти ғолиб деб топилган ҳамда давлат активларини бошқариш агентлиги Андижон вилоят ҳудудий бошқармаси билан «Асака ипаги» МЧЖ ўртасида 2022 йил 11 май куни 01-19/2022 сонли олди-сотди шартномаси имзоланган.

Шартноманинг 5.4 бандига мувофиқ объектдан самарасиз фойдаланиш, қисмларга бўлиб сотиш, бошқача тарзда бегоналаштириш, шартнома шартлари бўйича олинган мажбуриятлар тўлиқ бажариб бўлгунга қадар кредитнинг гаров таъминоти сифатида фойдаланиш, бузиб юбориш ва бошқа тарзда шикаст етказиш қатъий тақиқланиши белгилаб қўйилган. Шунингдек, ушбу бино ва иншоотлар аукционга қўйилишида ғолиб чиқувчи юридик ёки жисмоний шахс объектдан самарали фойдаланиши, инвестиция киритиши, иш ўринларини яратиши, белгиланган режаларни ўз вақтида бажариб бориши мақсадлари қўйилган.

«Бироқ 2021 йилдан буён Олтинкўл ҳамда Асака туманларида пиллачилик соҳасида кластер бўлиб фаолият юритиб келаётган ‘Асака ипаги’ МЧЖ раҳбари юқоридаги шартларга амал қилмасдан бино ва иншоотларни бошқа бир шахсга 180 минг долларга сотиб юборган», — дейилади хабарда.

«Асака пилла» МЧЖ раҳбари ушбу ҳудудни келишилган пулнинг маълум қисмини олиш жараёнида тегишли ҳуқуқни муҳофаза қилиш органлари томонидан қўлга олинган. Ҳозирда терговга қадар суриштирув ишлари олиб борилмоқда.

Аввалроқ Тошкент вилоятида 2 гектар ерни 140 минг долларга сотмоқчи бўлган шахслар ушлангани, Самарқандда ҳокимият захирасидаги ерни 65 минг долларга сотишга уринган шахслар қўлга олингани тўғрисида хабар берилганди.