Namanganda 1 gektar yer maydoni uchun 40 ming dollar talab qilgan shaxs va uning sheriklari qo‘lga olindi (video)

Namanganda 1 gektar yer maydoni uchun 40 ming dollar talab qilgan shaxs va uning sheriklari qo‘lga olindi. Bu haqda “Daryo”ga viloyat IIB matbuot xizmati ma’lum qildi.

Joriy yil may oyi boshlarida meva va poliz ekinlarini quritish hamda qadoqlash sexini tashkil etish maqsadi bo‘lgan fuqaro yer maydoni qidirib, Chust tumaniga boradi. Shu yerda mahalliy fuqarolardan biri bilan tanishadi. U Chust tumani, Qodirobod mahallasi hududida 1 gektar yeri borligi, bu yerni 40 000 dollarga sotishligini ma’lum qilib, tuman hokimining qarori va kadastr hujjatlarini tayyorlash uchun oldindan 15 000 dollar berish kerakligini aytadi.

19-may kuni Namangan tumanida yashovchi fuqaro viloyat IIB boshlig‘i nomiga ariza bilan murojaat qilib, 15 000 dollar avans talab qilayotgan shaxsning hatti-harakatlari qonuniyligini o‘rganib berishni so‘ragan.

“Mazkur arizaga asosan viloyat IIB JQB Yer resurslarini talon-taroj qilinishiga qarshi kurash bo‘limi, IIV ma’sul xodimi, diloyat prokuraturasi xodimlari tomonidan hamkorlikda tezkor tadbir o‘tkzildi. Tadbirda Chust tumanidagi bog‘dorchilikka ixtisoslashtirilgan 1 gektar maydonni o‘ziga tegishli ekanligini da’vo etib, arizachidan 15 000 dollar talab qilib, kelishilgan summadan 168 000 000 so‘m hisobidagi pullarni olgan shaxs ushlandi va ashyoviy dalillar qo‘lga kiritildi”, — deydi Namangan viloyat IIB matbuot xizmati rahbari Shokirjon Hoshimov.

Mazkur holat yuzasidan uch nafar shaxsga nisbatan to‘plangan hujjatlar yuzasidan tergovga qadar tekshiruv  olib borilmoqda.