Ижтимоий тармоқларда Тошкент метрополитенининг поезди бир неча дақиқага тўхтаб қолгани айтилаётган хабарлар тарқалди. «Тошкент метрополитени» давлат унитар корхонаси ҳолатга изоҳ берди.
Маълум қилинишича, «Чилонзор» йўналишида ҳаракатланиб келаётган поезд соат 10:50 лар атрофида электр таъминотидаги қисқа носозлик сабаб «Олмазор» бекатида тўхтаган. Йўловчилар эса бекатдан чиқарилган.
Шу сабаб «Чилонзор» йўналишининг қолган бекатларида ҳам поездлар ҳаракати белгиланган режа жадвалидан ўзгарган ҳолда бир томонлама ва кичик ҳалқа жадвали асосида ҳаракатланган.
«Ҳолат юзасидан мутасаддилар томонидан бир қатор ишлар амалга оширилганидан сўнг соат 11:58 да носозлик бартараф этилиб, поездлар доимий жадвал асосида ҳаракатланмоқда», — дейилади хабарда.
Эслатиб ўтамиз, 7 апрель куни Тошкент метро поезди «Пахтакор» бекатида тўхтаб қолган, 5 февраль куни «Халқлар дўстлиги» ва «Миллий боғ» бекатлари оралиғида ҳаракатланиб келаётган 4-сонли ҳаракат таркибида техник носозлик кузатилган ва поезд ҳаракатдан тўхтаган, 6 февраль куни эса метро поезди «Мустақиллик майдони» бекатида тўхтаб қолган эди.
Изоҳ (0)