Миллий масс-медиани қўллаб-қувватлаш ва ривожлантириш жамоат фонди Меtа компанияси билан ҳамкорликда элчихоналар, бош консулликлар, миссиялар, элчилар ва Ўзбекистон Ташқи ишлар вазирлиги вакилларининг Instagram ва Facebook’даги 40 дан ортиқ аккаунтларини верификациядан ўтқазди. Бу ҳақда фонд матбуот хизмати хабар берди.
Таъкидланишича, верификация натижасида мамлакат ташқарисидаги фуқаролар, хорижий фойдаланувчилар ва ОАВ Ўзбекистон дипломатик ваколатхоналарининг тасдиқланган аккаунтларини тўғри топиб, долзарб маълумотларни олиш имкониятига эга бўлади.
«Шунингдек, бу Ташқи ишлар вазирлигининг вакиллик тузилмаларига мамлакатнинг халқаро майдондаги мавқейини фаол тарғиб қилиш ва давлатимиз ҳақидаги фейк маълумотларга янада самарали қарши туриш имконини беради», — дейилади хабарда.
Эслатиб ўтамиз, 2018 йилда Шавкат Мирзиёев матбуот хизматининг Twitter’даги аккаунти верификациядан ўтиб, кўк белгига эга бўлганди.
Изоҳ (0)