Ижтимоий тармоқларда Фарғона шаҳридаги Марказий деҳқон бозори олдида жойлашган «Саховат иссиқ нон» МЧЖ савдо дўконида навбатлар юзага келгани кўринган видео тарқалганди. Мазкур ҳолат Фарғона шаҳар ҳокими Восилжон Назаров, сектор раҳбарлари ҳамда масалага даҳлдор бошқарма ва бўлим мутахассислари иштирокида ўрганилди. Бу ҳақда «Дарё»га шаҳар ҳокимлиги ахборот хизмати хабар берди.
Ўрганиш жараёнида кеча (1 июнь) кун давомида аввалроқ олинган ун ҳисобига нон нархи 1500 сўм бўлгани, шу боис нон маҳсулотлари эҳтиёждан кўп олингани учун навбат юзага келгани маълум бўлди.
«Аҳолига қулайлик яратиш, тирбандликнинг олдини олиш мақсадида бугундан бошлаб иссиқ нон корхонаси фаолиятини соат 08:00 дан эмас, 07:00 дан бошлади. Шунингдек, нон ишлаб чиқариш ҳажми ҳам ортди. Аҳоли талаби тўлиқ қондирилмоқда», — дейилади Фарғона шаҳар ҳокимлигининг «Дарё»га берган маълумотида.
Қолипли нон кеча, 1 июндан бошлаб Тошкентда 2800 сўмдан сотила бошлади. Ғалла бозори эркинлаштирилишини таҳлил қилган Иқтисодиёт вазирлиги Тошкентдаги «буханка» ноннинг ошишини, аввал жуда арзонлиги ва шу сабаб нонни қўй ва мол учун сотиб олиш кўпайиб кетганини маълум қилди. Монополияга қарши курашиш қўмитаси эса «буханка» ноннинг нархи ошганига муносабат билдириб, «буханка» нон нархи Тошкент шаҳрида энг юқори — 2800 сўм, Қашқадарёда вилоятида энг паст — 1650 сўм, республика бўйича ўртача нарх эса 2250 сўмдан сотилаётганини очиқлади.
Изоҳ (0)