1 июндан Ўзбекистон ва Туркманистон давлат чегарасидаги «Фарап-Олот» ўтказиш пунктлари одатий режимга қайтди ва Туркманистон ҳудудига хорижий автоташувчиларнинг кириши билан боғлиқ бир қатор чекловлар бекор қилинди. Бу ҳақда Давлат божхона қўмитаси матбуот хизмати «Дарё»га маълум қилди.
Таъкидланишича, бу ҳақда Ўзбекистон делегацияси таркибида Давлат божхона қўмитаси раиси ўринбосари Отабек Ибрагимовнинг Туркманистонга хизмат сафари доирасида Ашхобод шаҳрида божхона соҳасида бўлиб ўтган учрашувда маълум қилинган.
Ишчи учрашувда икки давлат ўртасида ўзаро савдода олиб ўтилган товарлар тўғрисида маълумот алмашинуви бўйича баённома лойиҳаси ҳамда божхона чегараси орқали олиб ўтилаётган товар ва транспорт воситалари тўғрисида олдиндан ахборот алмашинуви бўйича техник шартлар кўриб чиқилган.
Шунингдек, «Фарап-Олот» ўтказиш пунктлари орқали кунига камида 500 та юк автотранспорт воситаларининг ҳаракатланишини таъминлашга келишиб олинган. Хизмат сафари давомида Давлат божхона қўмитаси ходимлари Туркменбаши портида бўлиб, бу ердаги божхона тартиби билан яқиндан танишган.
Изоҳ (0)