Sayohatni rejalashtirishdan oldin nimalarga e’tibor berish kerak? Markaziy bankdan 10 ta moliyaviy maslahat

Safar yoqimli va samarali taassurotlarga boy bo‘lishi uchun tashkiliy masalalar oldindan o‘ylab qo‘yilishi kerak.

Markaziy bankning Finlit loyihasi xarajatlarni qisqartirish va sayohatdan oldin qanday vaziyatlarga tayyor bo‘lish borasida 10 ta moliyaviy maslahat taqdim etdi.

To‘lovlarni amalga oshirish imkoniyatlarini oldindan o‘rganib chiqish

Ko‘pchilik mashhur sayyohlik o‘lkalarida karta orqali to‘lovlarni erkin amalga oshirish yoki bankomatdan pul yechib olish mumkin.

Ammo ayrim mamlakatlarda sayohat vaqtida qiyinchiliklar paydo bo‘ladi. Misol uchun, valyuta ayirboshlash faqat bank ofislari orqali amalga oshirilishi yoki mahalliy do‘konlar bankomatlar va to‘lov terminallari bilan yetarlicha ta’minlanmagan bo‘lishi mumkin.

Shuningdek, sayohat amalga oshiriladigan kunlar o‘sha davlatning milliy bayram sanalariga to‘g‘ri kelmasligiga amin bo‘lish zarur, chunki bayram kunlari savdo nuqtalari yoki bank ofislari ishlamasligi mumkin.

Valyuta kurslarini solishtirish

Ba’zi hollarda, jo‘nashdan oldin so‘mni yevro yoki dollarga almashtirish, ularni joyida o‘sha mamlakatning milliy valyutasiga almashtirish foydalidir.

Shuningdek, mahalliy banklardan borilayotgan mamlakat valyutasini sotib olish imkoni bor yoki yo‘qligini tekshirib ko‘rish foydali.

Pullarni naqdlashtirish

Sayohat vaqtida pulni ikki xil ko‘rinishda – naqd va bank plastik kartasida saqlash maqsadga muvofiq.

Kichkina va kutilmagan xarajatlar uchun kichik miqdordagi naqd valyutalarni (masalan, choychaqa uchun 1-2 dollarlik banknotalarni) olib yurish tavsiya etiladi.

Mahalliy do‘konlarda tovarlar narxini taqqoslash uchun valyuta konvertasiyasini amalga oshiruvchi mobil ilovalarni ham har ehtimolga qarshi o‘rnatib olish manfaatli bo‘ladi.

Bankomatlarning joylashuv joyi to‘g‘risida va ulardan foydalanish qanchalik xavfsiz ekanini bilib olish

Google Maps yoki maxsus mobil ilovalardan foydalangan holda yashash joyi yaqinida bankomatlar mavjudligini aniqlash mumkin.

Xavfsizlik nuqtayi nazaridan bank filiali, mehmonxona yoki savdo markazining himoyalangan hududida joylashgan bankomatdan foydalanish maqsadga muvofiq.

Komission to‘lovlar miqdorini aniqlash

Xorijdagi foydalanmoqchi bo‘lgan bankomatlar naqd pul yechib olish va xaridlar uchun to‘lovlarni amalga oshirishda qancha miqdorda komissiya olishiga qiziqish bildirish kerak.

Buni bankning Call-markaziga qo‘ng‘iroq qilish orqali ham amalga oshirish mumkin. Ayrim banklar qulay kurslar bo‘yicha xaridlar uchun to‘lovlarni amalga oshirish yoki chet elda kartadan komissiyasiz naqd pul yechib olish imkonini beruvchi bank kartalarni ochishni taklif qiladi.

Shuningdek, karta bo‘yicha amalga oshiriladigan operatsiyalar soni yoki pul miqdori bo‘yicha cheklovlar mavjudligini oldindan bilib olish ma’qul.

Bir nechta xalqaro bank kartalarini ochish

Ba’zida to‘lov tizimlarida texnik nosozliklar yuzaga keladi va bu chet elda mablag‘siz qolishga ham sabab bo‘lishi mumkin. Borilayotgan davlatda qaysi xalqaro to‘lov tizimi eng ommabop ekanini oldindan aniqlash maqsadga muvofiq.

Shuningdek, kutilmagan vaziyatlarda qarindoshlar va yaqinlar kartaga pul o‘tkazmalarini amalga oshirishlari uchun ularga karta ma’lumotlarini qoldirish ham kichik bir maslahat.

Bank mobil ilovasini yuklab olish

Bankning mobil ilovasini smartfonga o‘rnatish hamda bankning aloqa raqamini saqlab qo‘yish yoddan chiqmasin.

Mobil ilova orqali kartadagi mablag‘larni monitoring qilish, kartadan kartaga to‘lovlarni amalga oshirish yoki bo‘lmasa sayohat davomida kredit, internet, kommunal xizmatlar va boshqalar uchun to‘lovlarni amalga oshirish mumkin.

Bundan tashqari, to‘satdan bank kartasi yo‘qolganda yoki o‘g‘irlanganda mobil ilova uni darhol bloklash imkoniyatini ham taqdim etadi.

Mobil operatorining rouming tariflarini bilib olish

Agar ta’til paytida ham ishlasangiz, xarajatlarning katta qismi aloqa va internet xizmatlari uchun to‘g‘ri kelishi mumkin.

Uyali aloqa operatori tariflarini yoki sayohat qilinadigan mamlakatda amal qiluvchi aloqa operatorining SIM-kartasini olish shartlarini ko‘rib chiqish maslahat beriladi. Chunki mahalliy internetdan foydalanish bir muncha arzon va foydali bo‘lishi mumkin.

Diqqatga sazovor joylarni tomosha qilish uchun turistik kartalar va chegirmalarni qidirish

Sayohat qilish uchun diqqatga sazovor joylar ro‘yxati tuzilganidan so‘ng, ular uchun chegirma va imtiyozlar mavjud yoki yo‘qligini tekshirib ko‘rish foydali. Aksariyat muzeylar talabalar uchun chegirmalarni taklif qiladi.

Ko‘pgina joylarda muzeylarga kirish uchun yagona chipta va turistik kartalar sotiladi. Ular yordamida asosiy diqqatga sazovor joylarni ko‘rish va shahar bo‘ylab harakatlanish birmuncha arzonroq bo‘ladi.

Bu orqali uzun navbatlarda turishdan ham xalos bo‘lish mumkin. Diqqatga sazovor joylarning rasmiy sayti orqali ularga kirish uchun to‘lovsiz kunlar (soatlar) bor yoki yo‘qligini bilib olish ham maqsadga muvofiq.

Xarajatlarni to‘g‘ri taqsimlash

Ko‘pincha dam olishga borilganda har xil vaziyatlarni inobatga olgan holda iloji boricha ko‘proq pul olib ketishga harakat qilinadi. Sayohat davomida oila a’zolariga sovg‘alar olish, restorandan qo‘shimcha taom olish, ko‘ngilochar o‘yinlarda ishtirok etish va shu kabi kutilmagan xarajatlar ko‘payib ketadi.

Natijada ta’tildan qaytilgandan so‘ng mablag‘ kamligi sababli xarajatlarni amalga oshirishda qiyinchiliklar yuzaga keladi. Shuning uchun, safarga ketishdan oldin pulni bir qismini uyda qoldirish lozim.

Avvalroq Markaziy bank qanday qilib pul tejab, yaxshi yashash mumkinligi to‘g‘risida tavsiyalar bergan edi.