ЖССТ эндемик касалликлар кўпроқ авж олаётгани ҳақида огоҳлантирди

Маймунчечак каби эндемик (маълум бир жойга хос бўлган) касалликларнинг авж олиши тобора кўпроқ кузатилмоқда, дея огоҳлантирди Жаҳон соғлиқни сақлаш ташкилотининг фавқулодда вазиятлар бўйича директори Майк Райан. Бу ҳақда Reuters хабар бермоқда.

Иқлим ўзгариши тез ўзгарувчан об-ҳаво шароитларига, хусусан, қурғоқчиликка имконият яратиши туфайли, ҳайвонлар ва одамлар ўз хатти-ҳаракатларини ўзгартирмоқда.

Натижада деди Райан, одатда ҳайвонлар орасида тарқалиб юрувчи касалликлар одамларга ҳам тобора кўпроқ юқмоқда.

«Экологик нозик жиҳатлар кўп, биз ҳозир шундай вазиятдамизки, жониворлар ва одамларнинг ўзаро таъсири жуда беқарор бўлиб турибди, бу касалликлар одамларга юқиши ҳолатлари кўпаймоқда ва кейин бизнинг қобилиятимиз, афсуски, ушбу касалликни ва унинг ҳамжамиятимиз ичкарисида ҳаракатланишини кучайтириш қобилиятимиз ошиб бормоқда», — деди у.

Шунингдек, Райан Африка учун эндемик бўлган, кемирувчилар томонидан тарқатиладиган ўткир вирусли касаллик — Ласса безгагига чалиниш ҳолатлари кўпайиб бораётганини қайд этди.

Эболага келсак, авваллари авж олиш ҳолатлари бир неча йилларда бир марта содир бўлган бўлса, энди бир неча ойда юз бермоқда, деди Райан.

«Шундай экан, мен ўйлайманки, бу биз учун бир сабоқ, бу касалликлар пайдо бўлаверади, улар босим ўтказаверади, турлар ўртасидаги тўсиқни енгиб ўтаверади. Масала шундаки, биз бунга жамоавий тарзда жавоб бера оламизми?» — дея таъкидлади у.

Райаннинг изоҳлари маймунчечакка чалиниш ҳолатлари ўсиб бораётган бир пайтда янгради.

Ушбу касаллик яқин мулоқотда бўлинган пайтда юқади, гриппга ўхшаш белгилар ва ўзига хос тошмаларни келтириб чиқаради.

1 июнь, чоршанба куни Буюк Британия Соғлиқни сақлаш агентлиги мамлакатда ушбу вирусли касалликнинг авж олиши сафарлар билан боғлиқ эмаслиги ва афтидан, одамдан одамга юқаётганини маълум қилди.

ЖССТ раҳбари Тедрос Адханом Гебрейесус Африкадан ташқарида (маймунчечак у ерда эндемик касаллик ҳисобланади)ги 30 та мамлакатда маймучечакка чалиниш бўйича 550 та ҳолат тасдиқлангани ҳақида хабар берди.

«Тадқиқотлар давом этмоқда, бироқ маймунчечак бир вақтнинг ўзида кўплаб мамлакатларда кутилмаганда пайдо бўлиши шуни тахмин қилиш имконини берадики, касалликнинг тарқалишини бироз вақт давомида сезмай қолганмиз», — деди Гебрейесус.

Шунга қарамай, ЖССТ 30 май куни маймунчечакнинг Африкадан ташқарида авж олиши пандемияга олиб келишига ишонмаслигини маълум қилганди.