1 июнь куни Канберрада Австралиянинг янги ҳукумати ишга киришди, унинг таркибига рекорд даражада кўп — 13 нафар аёл вазир кирди, деб хабар бермоқда Associated Press. Бу 30 та вазирлик лавозимининг деярли ярмига тенг. Вазирлар Маҳкамасига ҳам рекорд миқдордаги хотин-қизлар кирган: улар 23 ўриндан 10 тасини эгаллаган.
11 кун олдин бош вазир этиб сайланган Энтони Альбаниз «Австралиянинг ўзи каби хилма-хил бўлган бундай инклюзив ҳукуматни бошқаришдан жуда фахрланаман» деди. Анн Али вазир лавозимини эгаллаган биринчи мусулмон аёл бўлди — у Ёшлар ишлари вазирлигини бошқарган. Австралиянинг туб аҳоли вакили Линда Бёрни Тубжой халқлар ишлари вазирлигини ўз қўлига олди. Пенни Вонг ташқи ишлар котиби, Клер ЎНил ички ишлар котиби, Кети Галлагер эса ғазначилик котиби бўлди.
Йил бошидан бери дунёнинг ҳукумати янгиланган бошқа мамлакатларида ҳам аёл вазирларнинг улуши ортган. Масалан, Нидерландияда ҳозирда 29 та вазирлик лавозимидан 14 тасини аёллар эгаллаб турибди, шулардан 10 таси Вазирлар Маҳкамасида. Чили Вазирлар Маҳкамасидаги 24 аъзодан 14 нафари аёл вазирдир.
Иқтисодий ҳамкорлик ва тараққиёт ташкилоти маълумотларига кўра, 2021 йил учун вазирликларни бошқараётган аёлларнинг энг юқори улуши қуйидаги давлатларга тўғри келмоқда:
- Коста-Рика (52 фоиз);
- Австрия (57,1 фоиз);
- Бельгия (57,1 фоиз);
- Швеция (57,1 фоиз).
Изоҳ (0)