Иско «Реал» сафини тарк этаётганини маълум қилди. Футболчи хайрлашув хатида Мбаппе борасида ҳазил қилди

«Реал» ярим ҳимоячиси Иско мадридликлар сафини тарк этаётганини маълум қилди.

Исконинг «қаймоқранглилар» билан шартномаси ёзда ўз ниҳоясига етади. Иско «Реал»ни эркин агент сифатида тарк этмоқда.

«Малага»да бўлганимда, кетишим кераклигини англаганман.

Бошқа жамоа билан келишиб олгандим. Аммо «Реал» эшигимни «тақиллатди». Ҳеч қачон «Мадрид»га рад жавобини бериб бўлмайди, албатта, истиснолар бўлади?? (Килиан Мбаппени назарда тутмоқда).

Яқин инсонимга: «Жин урсин, ‘Реал’ узоқ йиллардан буён Чемпионлар Лигасида ғалаба қозона олмаяпти, мен клуб билан десимани қўлга киритаман» — дегандим. Ундан кейин содир бўлган барча воқеалар энди ўтмиш.

Орадан 9 йил ўтиб, жамоадаги фаолиятим ўз ниҳоясига етмоқда. «Реал» болалигимдаги орзу қилган барча нарсаларни рўёбга чиқаришга имкон берган клубдир.

Кўплаб совринларни қўлга киритиш орзусини амалга ошириш билан бирга, у менга буюклар билан ўйнаш, ажойиб инсонлар билан учрашиш имкониятини ҳам тақдим этди. Мен бу ерда жуда яхши вақт ўтказдим ва буни энди ҳеч ким тортиб ололмайди.

Жамоадошларим, мураббийлар, мураббийлар штаби, жамоа базаси ва «Сантиаго Бернабеу» ходимларига муҳаббат ва қўллаб-қувватлаш учун миннатдорчилик билдираман.

Мени биринчи кунданоқ илиқ кутиб олган ва қўллаган мухлисларга ҳам раҳмат айтмоқчиман. «Реал» мухлислари дунёнинг барча бурчагида жамоага ҳамроҳлик қилади.

Кўришгунча ва Hala Madrid!

Иско, «Реал» футболчиси