Садио Мане ёзда «Ливерпуль»ни тарк этади. Футболчи бошқа жамоа билан шахсий шартнома борасида келишиб олган

«Ливерпуль» вингери Садио Мане ёзда жамоасини ўзгартиради.

Сенегаллик футболчи янги чақириқларга тайёр. «Ливерпуль» буни расман тасдиқлайди, дея хабар беради журналист Фабрицио Романо.

«Бавария» Мане учун жиддий даъвогар бўлиб турибди. Аммо ҳозирча якуний қарор қабул қилингани йўқ. Садио Чемпионлар Лигаси финалидан олдин қарорини эълон қилишни хоҳламаган.

АS нашрининг маълумотига кўра, «Реал»га қарши ЕЧЛ финалидан сўнг футболчи «Ливерпуль» билан хайрлашган. «Мухлислар ва мураббийга барчаси учун раҳмат демоқчиман. Жамоага энг яхши тилакларни тилаб қоламан», — деб айтиб ўтган Садио.

Мане «Бавария» билан шахсий келишувга эришди, деб ёзади Николо Скира. Томонлар ўртасидаги битим 3 йилга мўлжалланган. Мюнхенликлар футболчи учун 30 миллион евро таклиф қилмоқчи. Аммо «қизиллар» Манени қимматроққа сотишни мўлжалламоқда.

Садио Мане 2016 йилдан буён «Ливерпуль» шарафини ҳимоя қилиб келади. У жамоа билан биргаликда Чемпионлар Лигаси, Англия чемпионати, Англия Кубоги, Лига Кубоги, Европа Суперкубоги ва клублар ўртасидаги Жаҳон чемпионатини қўлга киритган.