Дунё бўйлаб Марказий банклар йигирма йилдан кўпроқ вақт давомида илк бор оммавий равишда асосий ставкаларни оширмоқда. Financial Times бу вазиятни таҳлил қилди.
Маълумотларга кўра, бутун дунё бўйлаб сиёсатчилар сўнгги уч ой ичида асосий фоиз ставкаларининг 60 дан ортиқ оширилишини эълон қилди — бу камида 2000 йил бошидан бери энг катта кўрсаткичдир.
Рақамлар 2008 йилдаги глобал молиявий инқироздан кейин қабул қилинган ва коронавирус пандемияси даврида янада кучайган жуда қулай пул-кредит сиёсатининг тўсатдан ва географик жиҳатдан кенг тарқалган ўзгаришини кўрсатади.
Фоиз ставкалари сўнгги ўн йил ичида кўпгина ривожланган иқтисодларда мисли кўрилмаган паст даражада эди.
Сиёсатнинг кескин ўзгариши кўплаб мамлакатларда инфляция ўн йилликлар давомидаги энг юқори даражага етган бир пайтда содир бўлди.
Бу эса Россиянинг февраль ойида Украинага бостириб кириши ортидан энергия ва озиқ-овқат нархларининг кўтарилиши туфайли юзага келди.
Ставкалар ҳаттоки ўнлаб йиллар давомида паст даражада сақланиб қолган АҚШ ва Англияда ҳам оширилди.
Май ойи бошида АҚШ Федерал резерв тизими асосий ставкани 50 базавий пунктга ошириб, 0,75 фоиздан 1 фоизгача бўлган диапазонга кўтарди. Бу 2000 йилдан бери энг катта ўсишдир.
Европа Марказий банки июль ойида 2011 йилдан бери биринчи марта қарз олиш харажатларини оширмоқчи.
Канада, Австралия, Польша ва Ҳиндистон марказий банклари келгуси ҳафталарда ставкаларни ошириши кутилмоқда.
Шунга қарамай, ставкалар тарихий стандартларга кўра ҳали ҳам паст ва иқтисодчилар сўнгги ўсишлар глобал кескинлашув циклининг бошланиши, деб огоҳлантирмоқда.
Дунёдаги 20 та йирик марказий банкдан 16 таси келгуси олти ой ичида фоиз ставкаларини ошириши прогноз қилинмоқда.
Бразилия ўтган йилнинг март ойидан бери ставкаларни 2 фоиздан 12,75 фоизгача кўтарди. Мексика, Перу, Колумбия ва Чили ҳам қарз олишини оширди.
Африкада Гана, Миср ва Жанубий Африка ҳам ўз ставкаларини оширган.
Аввалроқ Россияда асосий ставка 11 фоизга пасайтирилгани ҳақида хабар берилган эди.
Изоҳ (0)