Швеция ва Финляндия Туркиянинг талабларини бажармаса, июнь охирида ўтказиладиган НАТО саммитида альянсга аъзолик учун номзод бўлиши даргумон, деди альянс бош котиби Йенс Столтенберг.
«Ҳеч ким терактлардан Туркиячалик жабр кўрмаган. Туркия — муҳим иттифоқчи, иттифоқчи бирор муаммони кўтарганда эса уни ҳал қилиш керак. Ҳар доим шундай бўлган», — деди Столтенберг.
Хусусан, НАТО бош котиби Грециянинг ветоси сабаб Шимолий Македониянинг альянсга қўшилиши учун ўн йилдан кўпроқ вақт кетганини, аммо якунда муаммо «ҳал қилинганини» эслатди.
НАТО саммити 28—30 июнь кунлари Мадридда бўлиб ўтади. Унда Швеция ва Финляндия таклиф этилган давлатлар сифатида қатнашиши мумкин, деди Столтенберг. Аммо 28 июнгача Туркиянинг талабларини бажармаса, бўлажак саммитда уларнинг номзод давлатлар бўлиши даргумон эканини қўшимча қилди. «Менинг мақсадим жараённи тезлаштириш эди ва фикримча, бунга ҳали вақтимиз бор», — дея қўшимча қилди бош котиб.
Ўтган ҳафта Швеция ва Финляндия НАТОга аъзо бўлиш учун ариза топширган. Бу давлатлар расмийларининг қарори Украинада Россия босқини бошланганидан кейин хавфсизлик соҳасидаги ўзгаришлар билан изоҳланган. Улар ушбу қарор Россияга қарши қаратилмаганини ва фақат ўз хавфсизлигини таъминлаш мақсадида қабул қилинганини таъкидлади.
Туркия Швеция ва Финляндиянинг альянсга аъзо бўлишига қарши чиқди. Туркия президенти Ражаб Тоййиб Эрдўғон бу давлатларни Курдистон Ишчи партиясидан бўлган «террорчиларни қўллаб-қувватлаётгани» ва Туркияга қарши санкциялар киритгани учун танқид қилди.
25 май куни Анқарада Швеция, Финляндия ва Туркия делегациялари музокаралар ўтказди. Эрдоғоннинг матбуот котиби Иброҳим Калиннинг маълум қилишича, Туркия ўз талабларини мамлакатларга етказган. Sabah нашри хабарига кўра, Анқара Хелсинки ва Стокгольмдан Курдистон ишчилар партияси ва унинг бўлинмаларини террорчи деб эълон қилиш, партия аъзоларини парламентга қабул қилмаслик ва «террорчилар»ни экстрадиция қилиш жараёнини тезлаштиришни талаб қилмоқда. Бундан ташқари, у Туркиянинг ҳарбий-саноат комплексига қарши киритилган санкцияларни «зудлик билан бекор қилишни» талаб қилган.
Изоҳ (0)