Shvetsiya va Finlyandiya Turkiyaning talablarini bajarmasa, iyun oxirida o‘tkaziladigan NATO sammitida alyansga a’zolik uchun nomzod bo‘lishi dargumon, dedi alyans bosh kotibi Yens Stoltenberg.
“Hech kim teraktlardan Turkiyachalik jabr ko‘rmagan. Turkiya — muhim ittifoqchi, ittifoqchi biror muammoni ko‘targanda esa uni hal qilish kerak. Har doim shunday bo‘lgan”, — dedi Stoltenberg.
Xususan, NATO bosh kotibi Gretsiyaning vetosi sabab Shimoliy Makedoniyaning alyansga qo‘shilishi uchun o‘n yildan ko‘proq vaqt ketganini, ammo yakunda muammo “hal qilinganini” eslatdi.
NATO sammiti 28—30-iyun kunlari Madridda bo‘lib o‘tadi. Unda Shvetsiya va Finlyandiya taklif etilgan davlatlar sifatida qatnashishi mumkin, dedi Stoltenberg. Ammo 28-iyungacha Turkiyaning talablarini bajarmasa, bo‘lajak sammitda ularning nomzod davlatlar bo‘lishi dargumon ekanini qo‘shimcha qildi. “Mening maqsadim jarayonni tezlashtirish edi va fikrimcha, bunga hali vaqtimiz bor”, — deya qo‘shimcha qildi bosh kotib.
O‘tgan hafta Shvetsiya va Finlyandiya NATOga a’zo bo‘lish uchun ariza topshirgan. Bu davlatlar rasmiylarining qarori Ukrainada Rossiya bosqini boshlanganidan keyin xavfsizlik sohasidagi o‘zgarishlar bilan izohlangan. Ular ushbu qaror Rossiyaga qarshi qaratilmaganini va faqat o‘z xavfsizligini ta’minlash maqsadida qabul qilinganini ta’kidladi.
Turkiya Shvetsiya va Finlyandiyaning alyansga a’zo bo‘lishiga qarshi chiqdi. Turkiya prezidenti Rajab Toyyib Erdo‘g‘on bu davlatlarni Kurdiston Ishchi partiyasidan bo‘lgan “terrorchilarni qo‘llab-quvvatlayotgani” va Turkiyaga qarshi sanksiyalar kiritgani uchun tanqid qildi.
25-may kuni Anqarada Shvetsiya, Finlyandiya va Turkiya delegatsiyalari muzokaralar o‘tkazdi. Erdog‘onning matbuot kotibi Ibrohim Kalinning ma’lum qilishicha, Turkiya o‘z talablarini mamlakatlarga yetkazgan. Sabah nashri xabariga ko‘ra, Anqara Xelsinki va Stokgolmdan Kurdiston ishchilar partiyasi va uning bo‘linmalarini terrorchi deb e’lon qilish, partiya a’zolarini parlamentga qabul qilmaslik va “terrorchilar”ni ekstraditsiya qilish jarayonini tezlashtirishni talab qilmoqda. Bundan tashqari, u Turkiyaning harbiy-sanoat kompleksiga qarshi kiritilgan sanksiyalarni “zudlik bilan bekor qilishni” talab qilgan.
Izoh (0)