АҚШ президенти Жо Байденнинг икки маслаҳатчиси нефть қазиб чиқаришни ошириш эҳтимоли ва бошқа бир қатор масалалар бўйича махфий музокаралар ўтказиш юзасидан Саудия Арабистонида ташриф билан бўлиб турибди. Бу ҳақда Axios портал ўз манбаларига таяниб хабар берди.
Яқин Шарқ ва Шимолий Африка бўйича мувофиқлаштирувчи Бретт Макгерк ва Давлат департаментининг глобал энергетика хавфсизлиги масалалари бўйича катта маслаҳатчиси Амос Хохштейн Ар-Риёдга 24 май, сешанба куни келган.
Axios маълумотларига кўра, Байден маъмурияти Ар-Риёд ва Қуддус муносабатларини нормаллаштириш бўйича Саудия Арабистони, Исроил ва Миср ўртасидаги музокараларда воситачилик қилмоқда. Гап, хусусан, Миср томонидан Саудия Арабистонига Қизил денгизда жойлашган Тиран ва Sanafiр оролларининг берилиши ҳақида бормоқда.
Шу билан бирга, Америка томони Ар-Риёддан нефть қазиб чиқаришни кечайтиришни сўрамоқда. Шу тариқа, Байден АҚШдаги оралиқ сайловлар олдидан газ нархини пасайтиришга ва Россия нефтига қарши санкциялар кенгайтирилишига эришишга умид қилмоқда.
Америка етакчиси июнь охирига режалаштирилган Яқин Шарққа сафарлар доирасида Саудия Арабистонига ташриф буюриш имкониятини кўриб чиқмоқда. Ушбу масалалар бўйича АҚШ ва Саудия Арабистони ўртасида келишувлар бўлиш-бўлмаслигига қараб Ар-Риёдга ташриф қарори аниқ бўлади.
Аввалроқ нефтнинг рекорд даражада қимматлашуви фонида Оқ уй Саудия Арабистони ва Бирлашган Араб Амирликлари билан муносабатларини қайта тиклашга уриниб кўрган эди. Март бошида президент Жо Байден, Саудия шаҳзодаси Муҳаммад ибн Салмон ва БАА шайхи Муҳаммад ибн Зайд ал Наҳайён билан телефон суҳбатини ташкил қилишга уринишган, аммо бу амалга ошмай қолган.
Кейинроқ Саудия Арабистони АҚШнинг жаҳон бозорида нарх тушишига эришиш учун хом ашё қазиб олишни ошириш илтимосини эътиборсиз қолдирганидан кейин, Вашингтон бу ғоядан воз кечган. Энди эса АҚШ Саудия Арабистони «Ғарбнинг Украинадаги саъй-ҳаракатларига зарар келтириши мумкин бўлган хатти-ҳаракатларни амалга оширмаслигини» истаяпти. Ар-Риёддаги манбаларга кўра, АҚШ мамлакатнинг Россия ёки Хитой билан яқин ҳамкорлигидан хавфсирамоқда.
Изоҳ (0)