Andijon viloyati IIB Terrorizm va ekstremizmga qarshi kurashish boshqarmasi hamda DXX Andijon viloyati boshqarmasi xodimlari hamkorligida olib borilgan tezkor tadbirlar davomida bir qator noqonuniy diniy saboq berish holatlariga chek qo‘yildi. Bu haqda viloyat IIB axborot xizmati xabar berdi.
Xususan, Asaka tumanida yashovchi muqaddam sudlangan shaxs (1971-yilda tug‘ilgan) yashash xonadonida qurilish ishlari olib borish niqobi ostida Andijon va Namangan viloyatlarida yashovchi 9 nafar fuqaroga noqonuniy diniy saboq berib kelayotgani aniqlangan.
Shuningdek, Andijon tumanida yashovchi muqaddam noqonuniy diniy saboq berish bilan shug‘ullangani uchun ma’muriy javobgarlikka tortilgan 49 yoshli ayol yashash xonadonida to‘rt nafar 6-7 yoshli bolaga noqonuniy diniy ta’lim berib kelgan.
Ushbu shaxslarga nisbatan Jinoyat kodeksining tegishli moddalari bilan jinoyat ishi qo‘zg‘atilgan.
Yana bir holatda Buloqboshi tumanida yashovchi shaxs (1975-yilda tug‘ilgan) moddiy manfaatdorlik evaziga o‘zining yashash xonadonida olti nafar voyaga yetmagan qizga maxsus diniy ma’lumoti bo‘lmay turib, diniy ta’limdan saboq berib kelayotgani aniqlangan va unga nisbatan ma’muriy javobgarlik masalasi ko‘rib chiqilgan.
Bundan tashqari, Baliqchi tumanida yashovchi 53 yoshli shaxs Qashqadaryo viloyatidan kelgan sakkiz nafar maktab o‘quvchisiga noqonuniy diniy saboq berib kelayotgani aniqlangan va unga nisbatan qonuniy chora ko‘rilgan.
Avvalroq Farg‘onada 20 nafar fuqaroga noqonuniy diniy ta’lim berib kelgan shaxs 15 sutkaga qamalgani, Toshkentdagi o‘quv markazda 43 va 19 yoshli ayollar noqonuniy diniy ta’lim bergani aniqlangani, Surxondaryoda uyida voyaga yetmagan bolalarga diniy saboq bergan erkak jarimaga tortilgani to‘g‘risida xabar berilgandi.
Izoh (0)