Чирчиқда 58 ёшли эркакни урган мактаб ўқувчиларига нисбатан жиноят иши қўзғатилди

Тошкент вилоятида вояга етмаган икки нафар бола 58 ёшли эркакни ургани тўғрисида хабар берилганди. Вилоят ИИББ матбуот котибининг маълум қилишича, ҳолат юзасидан жиноят иши қўзғатилган.

Мазкур воқеа 21 май куни соат 17:30 ларда содир бўлган. Вояга етмаган 8-синф ўқувчилари Н.Л. (2007 йилда туғилган) ва Э.А. (2007 йилда туғилган) жамиятда юриш-туриш қоидаларини қасддан менсимасдан, одоб-ахлоқ нормаларига зид равишда Чирчиқ шаҳар 4-кичик ноҳия ҳудудида Р.А.ни (58 ёшли) ҳеч бир сабабсиз уриб, безорилик содир этган.

Вилоят ИИББ вакилига кўра, 21 май куни Чирчиқ шаҳрида мактаб ўқувчилари безорилик содир этган ҳолати юзасидан Чирчиқ шаҳар ИИБ ҳузуридаги Тергов бўлими томонидан Жиноят кодексининг 277-моддаси (безорилик) 2-қисми «б» банди билан жиноят иши қўзғатилган. Болалар Жиноят-процессуал кодексининг 227-моддаси тартибида (суриштирувчининг, терговчининг ёки прокурорнинг қарорига биноан ушлаб туриш) ушланган.

Ҳозирда мазкур ҳолат юзасидан Чирчиқ шаҳар ИИБ ҳузуридаги Тергов бўлими томонидан дастлабки тергов ҳаракатлари олиб борилмоқда.

Бундан аввал Андижонда мактаб ўқувчиси уч нафар тенгдошини пичоқлагани, Сурхондарёдаги мактабда ўзаро жанжаллашган ўқитувчиларга жиноят иши қўзғатилгани ҳақида хабар берилган.