Бухоро шаҳрида 26—27 май кунлари ўтказилаётган Ўзбекистон камбағалликни қисқартириш халқаро форумининг очилиш маросими бўлиб ўтди. Бу ҳақда «Дарё» мухбири хабар бермоқда.
Форум камбағалликни қисқартириш, инсонлар ҳаёти сифатини ошириш, барқарор ривожланиш мақсадларига эришиш юзасидан Ўзбекистонда амалга оширилган ишлар ва истиқболдаги режаларни дунё ва минтақа экспертлари билан биргаликда муҳокама қилиш ҳамда фикр алмашиш, халқаро ташкилотлар билан ҳамкорлик алоқаларини янада мустаҳкамлаш мақсадида ташкил этилмоқда.
Форум аввалида иштирокчиларга президент Шавкат Мирзиёевнинг табриги ўқиб эшиттирилди. Қайд этилишича, Халқаро тадбирда 250 га яқин қатнашчилар, шу жумладан, Шанхай ҳамкорлик ташкилотига аъзо, кузатувчи ва ҳамкор давлатлар, халқаро ривожланиш институтлари, академик доиралар ва бошқа хорижий мамлакат ҳамда ташкилотларнинг жами 100 дан ортиқ вакиллари иштирок этмоқда.
Хусусан, форумда БМТнинг Тараққиёт дастури (БМТТД) бош котиб ўринбосари ва ёрдамчи маъмури Уша Рао-Монари, Жаҳон банкининг Европа ва Марказий Осиё бўйича минтақавий директори Лалита Мурти, Турк сиёсатчиси, Туркиянинг собиқ молия ва ғазначилик вазири Лутфи Элван, Жорж Вашингтон университети халқаро бизнес амалиёти профессори Дэнни Лейпцигэр, ШҲТ бош котиби Чжан Мин, Камбағаллик ва инсон тараққиёти бўйича Оксфорд ташаббуси директори Сабина Алкайр, Хитой халқаро камбағалликни қисқартириш маркази директори Лю Жунвеннинг иштироки кўзда тутилган.
Шунингдек, тадбирда БМТ, Ислом тараққиёт банки, Халқаро валюта жамғармаси, УНИCЕФ, Франция тараққиёт агентлиги, Осиё тараққиёт банки, БМТнинг озиқ-овқат ва қишлоқ хўжалиги ташкилоти, Глобал яшил ўсиш институти каби халқаро ташкилот ва молия институтлари вакиллари ҳам қатнашади.
Шу билан бирга, форумда маҳаллий тадбиркорлар, хусусан, ушбу соҳада муваффақиятга эришган ёшлар иштирокида мотивацион панел сессияси ташкил этилади. Ушбу тадбирда илғор тажрибадан ўрнак олиш ва ўрганиш, келажакка ишонишнинг аҳамияти, иштиёқ, ижобий фикрлаш ва оптимистик хатти-ҳаракатлар юзасидан фикр алмашилади. Форумда 10 та панел сессиялари ҳам ўтказилиши режалаштирилган.
Изоҳ (0)