Шимолий Корея шарқий йўналишда номаълум турдаги баллистик ракета учирди, бу КХДР ҳудудидан жорий йил учирилган 17-ракета бўлди. Бу ҳақда Жанубий Корея Штаб бошлиқлари бирлашган қўмитаси маълум қилди.
Япония мудофаа вазирлиги бу ахборотни тасдиқлаб, ракета денгизга келиб тушганини қўшимча қилди. Кейинроқ Шимолий Корея яна иккита ракета учирди, Япония қирғоқ хизмати маълумотларига кўра улар ҳам денгизга тушган.
Япония ҳукумати АҚШ президенти Жо Байденнинг Сеул ва Токиога ташрифи ҳамда QUAD саммити (Австралия, АҚШ, Ҳиндистон ва Япония иштирокидаги хавфсизлик бўйича тўрт томонлама мулоқот)дан кейин дарҳол амалга оширилган ракета парвозлари туфайли КХДРга норозилик билдирди.
«Бу Шимолий Корея томонидан очиқ-ойдин провокациядир. Бу мутлақо номақбул. Биз дипломатик каналлар бўйича норозилик билдирдик», — деди Япония мудофаа вазири Нобуо Киси.
КХДР учирган учта ракетанинг иккитаси 300 ва 750 км масофани босиб ўтиб, Япон денгизининг шарқий қисмига келиб тушган.
Yonhap агентлиги Штаб бошлиқлари қўмитасига таяниб ёзишича, Жанубий Корея ҳарбийлари КХДРнинг ушбу хатти-ҳаракатларига жавобан, «Хенму-2» баллистик ракеталарини учирди, АҚШ эса Япон денгизига қарата битта ATACMS снарядини учирди. Шу тариқа иттифоқчилар иттифоқ кучлари томонидан «зудлик билан зарба берилиши» имкониятларини кўз-кўз қилган.
«Баллистик ракеталарнинг провокацион учирилишига жавобан, АҚШ ва Корея Республикаси томонидан Elephant Walk авиация машғулотлари ўтказилди ва ‘ер—ер’ синфидаги ракеталари биргаликда учирилди», — дейилади Жанубий Корея ҳарбийлари баёнотида.
Ўтган ҳафта охирида Жанубий Кореяга Америка президенти Жо Байден ташриф буюрди. Оқ уй разведка маълумотларига таяниб, Шимолий Корея президентнинг ташрифи чоғида ёки ундан кейин ядро ёки ракета синовларини ўтказиши мумкинлигини тахмин қилганди. Байденнинг миллий хавфсизлик бўйича маслаҳатчиси Жейк Салливан ўшанда Вашингтон кутилмаган барча вазиятларга тайёрлигини таъкидлаганди.
Yonhap маълумотларига қараганда, КХДР ракеталарни учирган вақтда АҚШ президенти Японияни тарк этиб бўлганди.
Изоҳ (0)