Венгрия Украинадаги уруш туфайли фавқулодда ҳолат тартибини эълон қилди

Венгрия бош вазири Виктор Орбан Украинада давом этаётган уруш сабаб мамлакатда фавқулодда ҳолат тартибини эълон қилди, дея хабар берган Bloomberg.

Орбаннинг сўзларига кўра мазкур чора ҳукуматга манёврлар амалга ошириш ва Украинадаги вазият бўйича воқеа-ҳодисаларга тезкор муносабат билдириш имконини беради.

«Уруш ва Брюссель санкциялари катта иқтисодий йўқотишлар ва нархларнинг ўсишига олиб келаётганини кўряпмиз. Дунё иқтисодий инқироз ёқасига келиб қолган. Венгрия ҳукумати мазкур вазият туфайли, конституциядаги ваколатидан келиб чиқиб 25 майдан бошлаб фавқулодда ҳолат тартибини эълон қилди», — дея Украинадаги уруш мамлакатнинг энергетик ва иқтисодий хавфсизлигига таҳдид эканлигини қайд этган Венгрия бош вазири.

Яқин вақт ичида Венгрия ҳукумати томонидан фавқулодда ҳолат тартибининг дастлаб чоралари ҳақида ахборот берилиши кутилмоқда.

Венгрия Евроиттифоқ томонидан олтинчи санкциялар пакети лойиҳаси доирасида Россия нефтига нисбатан кескин чора яъни эмбарго қўллашга қарши чиқмоқда. Мамлакат вакиллари мазкур тақиқ Вегнрия иқтисодиётига жиддий зарар етказишидан хавотирдалигини билдирган.

Европа иттифоқи Россия нефтидан воз кечилгач Венгрия ва яна бир қатор мамлакатларга қўшимча компенсация тақдим этиши тахмин қилинган. Financial Times нашрининг ёзишича ЕИ раиси Шарл Мишелга ёзган хатида Орбан келаси ҳафтада ўтадиган мамлакатлар раҳбарлари иштирокидаги учрашувда нефть эмбаргоси масаласини муҳокама қилмасликка чақирган. Венгрия бош вазири мамлакатнинг Брюссель томонидан Будапештга кўрсатиладиган молиявий ёрдам ҳақида батафсил ахбороти тақдим этилмаса мамлакатнинг Россияга нисбатан нефть эмбаргосига дош бермаслигини таъкидлаган.