Бухоро шаҳрида 23 май куни ички ишлар органи ходими каналда чўкаётган кекса фуқаронинг ҳаётини сақлаб қолди. Бу ҳақда «Постда» хабар қилди.
Қайд этилишича, шу куни эрталаб соат 06:00 атрофида Бухоро шаҳрида хизмат олиб бораётган катта сержант Шавкат Тошев ҳамкасблари билан биргаликда каналда чўкиб кетаётган кекса ёшдаги фуқарони кўриб қолган. Тошев дарҳол чўкаётган фуқарони қутқариш чораларини кўрган ва уни сувдан чиқариб олган. Сўнгра унга биринчи тиббий ёрдам кўрсатилиб, тез ёрдам чақиртирилган.
Натижада Шавкат Тошев 87 ёшли, рус миллатига мансуб фуқаронинг ҳаётини сақлаб қолган. Айни пайтда у шаҳар Марказий касалхонасига жойлаштирилган, саломатлиги эса тиббиёт ходимлари назоратида.
Бундан аввал Нукусда ўзини каналга ташламоқчи бўлган қиз қутқариб қолингани, Бухорода ўзини дарахтга осиб, жонига қасд қилаётган аёл қутқарилгани, Бухорода ёнаётган уйдан фуқаро олиб чиқилгани хабар қилинганди.
Изоҳ (0)