ДХХнинг Сирдарё вилояти бўйича бошқармаси томонидан вилоят Божхона ҳамда Ички ишлар бошқармалари ходимлари билан ҳамкорликда ўтказилган тезкор тадбирлар натижасида ноқонуний майнинг фермалар фаолиятига чек қўйилди.
Тезкор тадбир давомида Гулистон шаҳрида яшовчи, муқаддам судланган 41 ёшли шахс Сирдарё вилояти марказидаги нотурар бинолардан бирини ижарага олиб, яширин равишда электр тармоғига уланган ҳолда майнинг қурилмаларидан фойдаланиши натижасида давлатга қарийб 532 миллион сўм миқдорида зарар етказгани аниқланган. Текширув давомида 19 дона майнинг қурилмаси ҳамда бошқа буюмлар ашёвий далил сифатида расмийлаштирилиб олинган.
Шунингдек, яна бир ҳолатда Тошкент шаҳрида яшовчи 32 ёшли фуқаро Гулистон шаҳрида жойлашган ва ўзининг отасига тегишли бўлган МЧЖ биносида майнинг қурилмаларини ўрнатган ҳолда 2022 йилнинг февраль ойидан буён 40 минг долларга тенг криптовалюта ишлаб чиқаргани маълум бўлган. Текширув давомида у майнинг соҳасида фаолият амалга оширганда фойдаланиладиган электр энергияси учун тўловларни тегишли тариф гуруҳига асосан белгиланган тарифга нисбатан 3 баробар ўсувчи коэффициентга мувофиқ тўламасдан, давлатга 134 миллион сўмдан ортиқ зарар етказгани аниқланган ҳамда 148 дона майнинг қурилмаси процессуал тартибда расмийлаштирилиб олинган.
Таъкидланишича, эндиликда ҳар икки қонунбузар ҳаракатига нисбатан ҳуқуқий баҳо берилади.
Аввалроқ Ўзбекистонда жисмоний шахсларга криптовалюта майнинги билан шуғулланиш тақиқланганди.
Изоҳ (0)