Тошкент аэропортида Нью-Йоркдан ўзи билан таркибида каннабис мойи бўлган шоколад, мармелад ва сақичлар олиб келган фуқаро тўхтатиб қолинди. Бу ҳақда Давлат божхона қўмитаси матбуот хизмати хабар берди.
Маълум қилинишича, 13 май куни Нью-Йорк—Тошкент рейси бўйича келган йўловчининг юклари белгиланган тартибда назорат рентген ускунаси орқали кўздан кечирилган. Божхона текшируви натижасида жами 18 та қадоқда желатин кўринишдаги сақич, 2 қути конфет ва битта қадоқдаги 10 дона шоколад таркибида каннабис мойи гиёҳвандлик моддаси борлиги аниқланган.
Бундан ташқари, божхона кўриги давомида ушбу шахснинг қўл юки ва багажлари орасида ичига суюқлик шаклида гиёҳвандлик модда жойлаштирилган ва унинг истеъмоли учун хизмат қилувчи 6 турдаги 14 дона турли қурилма ва воситалар, ичига солинган наркотик воситасини майдалаб кукун ҳолатига келтирувчи бир дона қурилма ҳамда наркотик моддасини чекишда фойдаланиладиган 4 дона махсус қоғоз ўрам борлиги аниқланган.
Йўловчининг кўзойнаги ғилофига яширилган 1,2 грамм марихуана гиёҳвандлик воситаси ҳам фош этилган.
Юк эгаси ушбу гиёҳвандлик моддасини даволаниш учун ўзи истеъмол қилишини ва амалдаги тартибларни билмаслигини маълум қилган. Ҳозирда мазкур ҳолат юзасидан божхона органлари томонидан терговга қадар текширув ҳаракатлари олиб борилмоқда.
Аввалроқ Ўзбекистонда Тожикистондан келтирган гиёҳванд моддаларни сотиш билан шуғулланган шахслар қўлга олингани, Сурхондарёда хизмат ити вагон ғилдирагига яширилган 1,7 килограмм гиёҳванд моддаларни аниқлагани, Тошкентда 3 кг героин ва 7,5 кг опийни Афғонистондан лаганлар орасига яшириб олиб ўтган шахслар ушлангани тўғрисида хабар берилганди.
Изоҳ (0)