DXXning Sirdaryo viloyati bo‘yicha boshqarmasi tomonidan viloyat Bojxona hamda Ichki ishlar boshqarmalari xodimlari bilan hamkorlikda o‘tkazilgan tezkor tadbirlar natijasida noqonuniy mayning fermalar faoliyatiga chek qo‘yildi.
Tezkor tadbir davomida Guliston shahrida yashovchi, muqaddam sudlangan 41 yoshli shaxs Sirdaryo viloyati markazidagi noturar binolardan birini ijaraga olib, yashirin ravishda elektr tarmog‘iga ulangan holda mayning qurilmalaridan foydalanishi natijasida davlatga qariyb 532 million so‘m miqdorida zarar yetkazgani aniqlangan. Tekshiruv davomida 19 dona mayning qurilmasi hamda boshqa buyumlar ashyoviy dalil sifatida rasmiylashtirilib olingan.
Shuningdek, yana bir holatda Toshkent shahrida yashovchi 32 yoshli fuqaro Guliston shahrida joylashgan va o‘zining otasiga tegishli bo‘lgan MCHJ binosida mayning qurilmalarini o‘rnatgan holda 2022-yilning fevral oyidan buyon 40 ming dollarga teng kriptovalyuta ishlab chiqargani ma’lum bo‘lgan. Tekshiruv davomida u mayning sohasida faoliyat amalga oshirganda foydalaniladigan elektr energiyasi uchun to‘lovlarni tegishli tarif guruhiga asosan belgilangan tarifga nisbatan 3 barobar o‘suvchi koeffitsiyentga muvofiq to‘lamasdan, davlatga 134 million so‘mdan ortiq zarar yetkazgani aniqlangan hamda 148 dona mayning qurilmasi protsessual tartibda rasmiylashtirilib olingan.
Ta’kidlanishicha, endilikda har ikki qonunbuzar harakatiga nisbatan huquqiy baho beriladi.
Avvalroq O‘zbekistonda jismoniy shaxslarga kriptovalyuta mayningi bilan shug‘ullanish taqiqlangandi.
Izoh (0)