АҚШ президенти Жо Байден мамлакатнинг Ўзбекистондаги навбатдаги элчиси сифатида узоқ йиллик тажрибага эга дипломат Жонатан Ҳеник номзодини кўрсатди. Бу ҳақда «Америка овози» нашри хабар берди.
Номзод Конгресснинг юқори палатаси, Сенат тасдиғидан ўтиши керак. Американинг Тошкентдаги ҳозирги элчиси Даниел Розенблум фаолиятини бошлаганига уч йилдан ошди. Ҳеник тўлиқ тасдиқлангунча Розенблум вазифасида давом этади.
Нью-Йоркда улғайган Ҳеник яқингача АҚШ Давлат департаментида Марказий Осиё бўйича бош дипломат эди. У, шунингдек, халқ дипломатияси йўналишда узоқ йиллар хизмат қилган.
Айни дамда Ҳеник АҚШ Мудофаа университетининг Киберхавфсизлик ва ахборот коллежида Давлат департаментининг масъули лавозимида фаолият юритмоқда. Дипломат дезинформацияга қарши кураш бўйича кучли мутахассис саналади.
Эслатиб ўтамиз, 2019 йилнинг апрелида АҚШ Сенати Даниэль Розенблюмни мамлакатнинг Ўзбекистондаги фавқулодда ва мухтор элчиси сифатида тасдиқлаганди. Бунга қадар у АҚШ давлат котибининг Жанубий ва Марказий Осиё ишлари бўйича ёрдамчиси ўринбосари лавозимида фаолият юритган.
Изоҳ (0)