Ижтимоий тармоқларда Андижон вилояти Хўжаобод тумани янги машина бозор олдидаги кўп қаватли уйнинг устидан икки ёш ўзини ташламоқчи бўлгани айтилган видео тарқалди. Вилояти ИИБ ҳолатга муносабат билдирди.
Маълум қилинишича, 20 май куни 17:20 ларда Хўжаобод тумани «Мустақилликнинг 30 йиллиги» МФЙ ҳудудида жойлашган кўп қаватли уйда яшовчи Х. исмли фуқаро М. исмли қиз билан бирга атрофни томоша қилиш мақсадида кўп қаватли уйнинг том қисмида ўтирган. Шу пайтда ҳудудда яшовчи фуқаролар гўёки улар томдан ўзларини ташламоқчи дея видеога олган.
Ушбу ҳолат юзасидан Андижон вилояти ИИВнинг 102 ишонч рақамига мурожаат келиб тушган ва мазкур ҳолат юзасидан Хўжаобод тумани ИИБ масъул ходимлари воқеа жойига бориб, ҳолат бўйича суриштирув ишлари олиб борган.
Фуқаролар Х. ва М. тушунтириш хатида у ерга иккиси ҳам атрофни томоша қилиш мақсадида чиққани ва ўзаро гаплашиб ўтиришганини, кўп қаватли уйнинг том қисмидан сакраш нияти бўлмаганини билдирган. Ҳолат юзасидан фуқаролар билан якка тартибда суҳбат ўтказилиб, профилактик ишлар амалга оширилган. Келгусида бу каби ҳолатларга йўл қўймасликлари ҳақида огоҳлантирилган.
Аввалроқ Андижонда 2022 йилнинг дастлабки уч ойида 10 нафар мактаб ўқувчиси ўз жонига қасд қилгани, Нукусда 21 ёшли қиз каналга сакраб ўз жонига нима сабабдан қасд қилмоқчи бўлгани аниқлангани тўғрисида хабар берилганди.
Изоҳ (0)