Андижонда 2022 йилнинг ўтган тўрт ойи давомида 1221 нафар аёлга ҳимоя ордери берилди. Бу ҳақда «Дарё» мухбири Умиджон Мамарасулов хабар бермоқда.
Вилоят ички ишлар бошқармаси ҳуқуқбузарликлар профилактикаси бошлиғи ўринбосари, хотин-қизлар ва ижтимоий масалалар бўйича бўлим бошлиғи, подполковник Гулнора Абдувоҳидованинг маълум қилишича, шаҳар ва туман ИИБ ҲПБ хотин-қизлар масалалари бўйича катта инспекторлари ҳамда профилактика инспекторлари билан ҳамкорликда доимий равишда оилада ва жамиятда зўравонлик жиноятларининг жабрланувчиларига айланган хотин-қизларни аниқлаш бўйича профилактик тадбирлар олиб борилмоқда. Ушбу тадбирлар натижасида жорий йилнинг тўрт ойи давомида тазйиқ ва зўравонликдан жабрланувчиларига айланган 1221 нафар хотин-қизларга ҳимоя ордерлари берилган.
1221 та ҳолатдан 832 таси эри томонидан хотинига, 43 тасида қайнона томонидан келинига, 17 тасида келин томонидан қайнонага, 329 та ҳолатда эса бошқа шахслар томонидан тазйиқ ва зўравонлик содир этилганлиги аниқланган. Уларнинг 406 тасини жисмоний, 664 тасини руҳий, 2 тасини иқтисодий зўравонлик ташкил этган. 148 та ҳолатда эса тазйиқ ўтказилган. Ҳолатларнинг 1137 таси оилада, 60 таси кўчада, 18 таси иш жойида, 4 таси жамоат жойида ва 2 таси таълим муассасада содир этилган.
Қўшимча қилинишича, энг кўп тазйиқ ва зўравонлик ҳолатлари Пахтаобод (149), Шаҳрихон (116), Жалақудуқ (98), Олтинкўл (95), Андижон (91) туманларида содир этилган.
«Тўрт ой давомида тазйиқ ва зўравонликка учраган хотин-қизларнинг 22 нафарига такрорий ҳимоя ордерлари берилган бўлса, 8 нафарининг ордерининг амал қилиш муддати узайтирилган. Ҳимоя ордери берилган хотин-қизларнинг 3 нафари эса реабилитация марказига жойлаштирилган. 4 нафар фуқаро эса ҳимоя ордери олишдан бош тортган.
Изоҳ (0)