Andijonda 2022-yilning o‘tgan to‘rt oyi davomida 1221 nafar ayolga himoya orderi berildi. Bu haqda “Daryo” muxbiri Umidjon Mamarasulov xabar bermoqda.
Viloyat ichki ishlar boshqarmasi huquqbuzarliklar profilaktikasi boshlig‘i o‘rinbosari, xotin-qizlar va ijtimoiy masalalar bo‘yicha bo‘lim boshlig‘i, podpolkovnik Gulnora Abduvohidovaning ma’lum qilishicha, shahar va tuman IIB HPB xotin-qizlar masalalari bo‘yicha katta inspektorlari hamda profilaktika inspektorlari bilan hamkorlikda doimiy ravishda oilada va jamiyatda zo‘ravonlik jinoyatlarining jabrlanuvchilariga aylangan xotin-qizlarni aniqlash bo‘yicha profilaktik tadbirlar olib borilmoqda. Ushbu tadbirlar natijasida joriy yilning to‘rt oyi davomida tazyiq va zo‘ravonlikdan jabrlanuvchilariga aylangan 1221 nafar xotin-qizlarga himoya orderlari berilgan.
1221 ta holatdan 832 tasi eri tomonidan xotiniga, 43 tasida qaynona tomonidan keliniga, 17 tasida kelin tomonidan qaynonaga, 329 ta holatda esa boshqa shaxslar tomonidan tazyiq va zo‘ravonlik sodir etilganligi aniqlangan. Ularning 406 tasini jismoniy, 664 tasini ruhiy, 2 tasini iqtisodiy zo‘ravonlik tashkil etgan. 148 ta holatda esa tazyiq o‘tkazilgan. Holatlarning 1137 tasi oilada, 60 tasi ko‘chada, 18 tasi ish joyida, 4 tasi jamoat joyida va 2 tasi ta’lim muassasada sodir etilgan.
Qo‘shimcha qilinishicha, eng ko‘p tazyiq va zo‘ravonlik holatlari Paxtaobod (149), Shahrixon (116), Jalaquduq (98), Oltinko‘l (95), Andijon (91) tumanlarida sodir etilgan.
“To‘rt oy davomida tazyiq va zo‘ravonlikka uchragan xotin-qizlarning 22 nafariga takroriy himoya orderlari berilgan bo‘lsa, 8 nafarining orderining amal qilish muddati uzaytirilgan. Himoya orderi berilgan xotin-qizlarning 3 nafari esa reabilitatsiya markaziga joylashtirilgan. 4 nafar fuqaro esa himoya orderi olishdan bosh tortgan.
Mavzuga doir:
Izoh (0)