Шри-Ланка Осиё-Тинч океани минтақасидаги XXI асрда дефолт бўлган илк давлатга айланди
Шри-Ланка Марказий банки мамлакат ташқи қарзни тўлаш муддатини ўтказиб юборганини тасдиқлади. Бу Осиё-Тинч океани минтақасидаги бир аср ичидаги биринчи суверен дефолтдир, дея хабар беради Financial Times Moody’s агентлигига таяниб.
Икки халқаро суверен облигациялар бўйича фоизларни тўлаш учун 30 кунлик имтиёзли давр 18 май куни тугади. Moody’s рейтингига кўра, Осиёда дефолтга учраган охирги суверен қарз олувчи давлат 1999 йилда Покистон бўлган.
Президент Готабая Ражапакса ҳукумати ўтган ой Шри-Ланка ёқилғи, дори-дармон ва озиқ-овқат каби импорт учун валюта захираларини сақлаш мақсадида халқаро қарзини тўлашни тўхтатишини айтди.
Шри-Ланканинг халқаро облигациялар эгалари, шунингдек, Хитой, Япония ва Ҳиндистон каби давлатларда икки томонлама кредиторлардан 51 млрд долларга яқин қарзи бор.
19 май куни бўлиб ўтган брифингда Марказий банк раҳбари Нандалал Верасинҳ Шри-Ланка кредиторлари энди мамлакатни техник жиҳатдан дефолт деб ҳисоблашлари мумкинлигини тасдиқлади.
S&P ўтган ой Шри-Ланканинг хорижий валютадаги рейтингини ўтказиб юборилган фоиз тўловлари бўйича дефолт даражасига туширган эди.
Таҳлилчиларнинг таъкидлашича, глобал фоиз ставкаларининг ўсиши, энергия нархининг юқорилиги ва инфляциянинг кўтарилиши Шри-Ланка каби импортга қарам бўлган ривожланаётган иқтисодиётларга босим ўтказмоқда.
Аввалроқ Шри-Ланкада ҳукуматга қарши норозилик намойишлари давом этаётгани ҳақида хабар берилган эди.
