Аввалроқ маҳаллий бозордан кетиши ҳақида эълон қилган McDonald’s компаниясининг Россиядаги бизнесини яқин вақтларда Қозоғистон собиқ президенти Нурсултон Назарбоевнинг қариндоши Кайрат Боранбаев ёки новокузнецклик бизнесмен Александр Говор сотиб олиши мумкин. Бу ҳақда The Bell нашри «компания тақдирини кузатиб бораётган» манбаларига таяниб хабар берди ва олди-сотди ҳақида 19 май, бугун расман эълон қилиниши мумкинлигини таъкидлади.
Боранбаев СПП компаниясига эгалик қилиб, у McDonald’s’нинг Свердлов, Оренбург, Челябинск, Курган, Тюмен ва Киров вилоятларидаги тармоқларини бошқарган. Тадбиркор Беларусь ва Қозоғистондаги McDonald’s франшизасига эгалик қилади. Шунингдек, «КазРосГаз» ҚК АЖ собиқ бош директори сифатида ҳам таниқли. Аввалроқ «Коммерсантъ»нинг иккита манбаси ҳам Кайрат Боранбаевнинг тузилмалари McDonald’s хусусий объектларининг янги эгасига айланишини тахмин қилганди.
Кайрат Боранбаев Қозоғистоннинг энг бой бизнесменлари рўйхатига кирган. У мамлакат собиқ президенти Нурсултон Назарбоев оиласининг аъзосидир: унинг қизи Назарбоевнинг 2020 йилда вафот этган неварасига турмушга чиққан эди. 2022 йил баҳорида Боранбаев жиноий таъқибга учради — қишки норозиликлардан кейин Назарбоев атрофидаги бошқа бир қатор одамлар сингари. У ўғирлик ҳақидаги иш бўйича ҳибсга олинганди.
Александр Говорнинг «ГиД» компанияси McDonald’s’нинг Новосибирск, Бердск, Томск, Кемерово, Новокузнецк, Барнаул ва Красноярскдаги 25 та муассасасига раҳбарлик қилган. Говор, шунингдек, «НефтьeХимСервис» нефтни қайта ишлаш корхонаси директорлар кенгаши аъзоси ҳам ҳисобланади.
Компания вакиллари The Bell нашри сўровига жавоб бермади ва McDonald’s билан эҳтимолий битимни изоҳламади.
Аввалроқ McDonald’s Россиядан бутунлай чиқиб кетишини эълон қилганди. «Компания Россиядаги барча McDonald’s ресторанларини маҳаллий харидорга сотиш ниятида. Компания ушбу ресторанларни «деархизация» жараёнини бошламоқчи, бу эса McDonald’s номи, логотипи, брендинги ва менюсидан фойдаланишни тақиқлашни назарда тутади», — дейилганди компания баёнотида.
Изоҳ (0)