Россияда саломатлиги ёмонлашган ўзбекистонлик ватанга қайтарилди

Россиянинг Амур вилоятида саломатлиги ёмонлашган фуқаро Ўзбекистонга қайтарилди. Бу ҳақда Ташқи меҳнат миграцияси агентлиги хабар қилди.

Қайд этилишича, Ўзбекистоннинг Владивосток шаҳридаги Бош консулхонасига асли Қорақалпоғистондан бўлган фуқаро Э.Э. саломатлиги ёмонлашгани ва молиявий қийин аҳволда қолиб ватанга қайтиб кетолмаётганини айтиб, мурожаат қилган.

Маълум бўлишича, фуқаро жорий йил февраль ойида вақтинчалик меҳнат фаолиятини амалга ошириш учун Амур вилоятига ишлаш учун келган. Иш жараёнида соғлиғида муаммолар юзага келган ва Свободний шаҳар шифохонасида даволаниб чиққан.

Ташқи меҳнат миграцияси агентлиги Новосибирск шаҳридаги ваколатхонаси ва Ўзбекистоннинг Владивосток шаҳридаги Бош консулхонаси ҳамкорлигида Э.Э. ватанга қайтарилган.

Аввалроқ Москва вилоятида содир бўлган ёнғин оқибатида икки нафар Ўзбекистон фуқароси ҳалок бўлгани, Россияда иш берувчи томонидан паспортлари олиб қўйилган ўзбекистонликларнинг ҳужжатлари қайтарилгани, Новосибирскда вояга етмаган фарзанди билан қийин аҳволда қолган ўзбекистонлик аёл ватанга олиб келингани хабар қилинганди.