2022 йилнинг апрель ойида Марказий банк томонидан ўтказилган сўров натижаларига кўра, аҳоли томонидан сезилган инфляция март ойидаги кўрсаткичга нисбатан 1,1 фоиз бандга пастлаб, 14,6 фоизни ташкил этди.
Сўровномада умумий жавоб берувчиларнинг аксарият қисми инфляцияни 9-12 фоиз атрофида сезишган. Нархлар ошишининг юқори бўлганини таъкидлаган аҳоли орасида ҳам пасайиш кузатилган.
Кўпчилик апрель ойида ўсимлик ёғи, шакар ва қандолат маҳсулотлари ҳамда нон ва ун маҳсулотлари қимматлаганини сезишган бўлса, ичимликлар, дуккакли маҳсулотлар ҳамда алоқа ва интернет нархи бироз ошганини таъкидлашган.
Умумий овқатланиш, қурилиш, ишлаб чиқариш, қишлоқ хўжалиги ҳамда тиббиёт соҳаларида фаолият юритаётган аҳоли томонидан сезилган инфляция даражаси бошқа соҳа вакилларига нисбатан юқорироқ бўлган.
Бухоро, Наманган ҳамда Хоразм вилоятларида инфляция қолган ҳудудларга қараганда юқорироқ кузатилган бўлса, нисбатан паст кўрсаткичлар Сурхондарё ва Андижон вилоятларида қайд этилган.
Аввалроқ 2022 йилнинг апрель ойида истеъмол бозоридаги товарлар ва хизматларнинг инфляция даражаси 1,5 фоизни ташкил этгани ҳақида хабар берилган эди.
Изоҳ (0)