Uzbekistan Airways Тошкент—Прага йўналиши бўйича чартер рейсларни йўлга қўйди. Бу ҳақда Чехиянинг «Airways.cз» нашри хабар берди.
Uzbekistan Airways’нинг Airbus A320neo лайнери Чехия пойтахтига ўзининг биринчи парвозини 15 май куни амалга оширган. Авиақатновлар ёз мавсуми давомида ҳар ҳафта амалга оширилади — сўнгги рейс 4 сентябрга режалаштирилган.
Парвозлар якшанба кунлари амалга оширилади. Нашрнинг ёзишича, Прагадан учиш вақти соат 15:20 бўлиб, Тошкентга соат 23:25 да келиб қўнади.
Чипта нархи 3 902 549 сўмни (350 доллар) ташкил этади. Бунинг ичидан 8 килограммгача қўл юки ва 23 килограммгача багаж ўрин олган.
Таъкидланишича, парвозлар Ўзбекистондаги тур операторлар томонидан ташкиллаштирилмоқда. Улар Чехияга учувчи ўзбекистонликлар, шунингдек, Марказий Осиё республикаларига ташриф буюришни истаган чехиялик туристлар учун мўлжалланган.
Аввалроқ Turkish Airlines Истанбул—Бухоро йўналиши бўйича мунтазам рейсларни йўлга қўйиши, Тошкент—Шарм ал-Шайх—Тошкент йўналиши бўйича 7 майдан мунтазам авиақатновлар бошлангани тўғрисида хабар берилганди.
Изоҳ (0)