Шавкат Мирзиёев 16 май куни Ўзбекистонда ташриф билан бўлиб турган Шанхай ҳамкорлик ташкилоти бош котиби Чжан Минни қабул қилди. Бу ҳақда Президент матбуот хизмати хабар қилди.
Қайд этилишича, учрашувда ШҲТ доирасида амалий ҳамкорликни кенгайтириш ва минтақавий шерикликни мустаҳкамлаш, шунингдек, Ўзбекистоннинг ташкилотга раислиги давридаги асосий тадбирларга тайёргарлик кўриш масалалари кўриб чиқилган. Жорий йил учун режалаштирилган учрашув ва йиғилишларнинг ярми муваффақиятли ўтказиб бўлингани қайд этилган. Самарқанд шаҳрида ўтказиладиган ШҲТ саммити ҳужжатларини келишиш бўйича иш олиб борилган.
Барқарорлик ва хавфсизлик учун хавф туғдираётган хатар ва таҳдидларга қарши курашишда ташкилот салоҳиятини кучайтириш, «Шанхай руҳи» принциплари асосида ҳамкорликни чуқурлаштириш зарурлиги таъкидланган. Транспорт соҳасида ўзаро боғлиқлик, «яшил» энергетика, инновациялар, рақамли иқтисодиёт, саноат кооперацияси борасидаги қўшма лойиҳаларни илгари суришга алоҳида эътибор қаратилган.
«Учрашувда халқаро кун тартибининг долзарб муаммоларига ҳам тўхталиб ўтилди. Афғонистон масаласида ШҲТ ролини ошириш ҳамда ушбу мамлакатни инфрутазилмавий ривожланиш бўйича минтақавий дастурларга фаол жалб қилиш зарурлиги қайд этилди», — дейилади хабарда.
Самарқандда бўлиб ўтадиган ШҲТ саммити
Шанхай ҳамкорлик ташкилотининг Самарқанд саммити 2022 йил 15—16 сентябрь кунлари бўлиб ўтади. 16 май куни Ўзбекистон ташқи ишлар вазири вазифасини бажарувчи Владимир Норов ва ШҲТ бош котиби Чжан Мин билан бўлиб ўтган суҳбатда саммитга тайёргарлик кўриш масалалари муҳокама қилинди. Саммитда иштирок этиш учун 20 дан зиёд давлатлар раҳбарлари ташриф буюради.
Халқаро аҳамиятга эга тадбир ташкилий ишлари учун йўл ва кўчаларни таъмирлашга 25 миллион доллар ажратилган. ШҲТ саммитига тайёргарлик ишларида 7,4 миллиард сўм талон-торож қилинган. Самарқанд вилояти ҳокимияти саммити иштирокчилари учун хусусий турар жой бинолари ўрнига меҳмонхоналар қуриш режасидан воз кечган.
Маълумот учун, Шанхай ҳамкорлик ташкилотининг Самарқанд саммити Эрон 2021 йил сентябрида ташкилотга тўлақонли иштирокчи сифатида қўшилганидан бери биринчиси бўлади. ШҲТга аъзо давлатлар: Ўзбекистон, Хитой, Россия, Қозоғистон, Қирғизистон, Тожикистон, Покистон, Ҳиндистон ва Эрон. Афғонистон, Мўғулистон ва Беларусь ташкилотда кузатувчи, Туркия эса мулоқот бўйича ҳамкор сифатида иштирок этади.
Саммитда ташкилотга аъзо кўплаб давлатлар билан умумий чегарага эга Афғонистондаги вазият ҳар томонлама муҳокама қилинади ва муҳим қарорлар қабул қилиниши кутилмоқда.
Изоҳ (0)