2022 йилнинг апрель ойи якунлари бўйича йиллик инфляция даражаси 10,4 фоизни, озиқ-овқат маҳсулотлари инфляцияси эса 13,4 фоизни ташкил этди. Бу ҳақда Марказий банкнинг шарҳидан маълум бўлди.
Бунда, истеъмол товарлари нархларининг ўзгариши аҳолининг турли даромадли гуруҳларига турлича қийматга эга бўлди.
Апрель ойида барча даромад гуруҳларида озиқ-овқат маҳсулотлари нархларининг ўсиши секинлашгани кузатилди. Бу айрим асосий турдаги мева ва сабзавотларнинг янги ҳосили чиқиши ҳисобига нархларнинг мавсумий пасайиши билан изоҳланади.
Озиқ-овқат инфляцияси ўсишининг секинлашгани, айниқса, нисбатан кам даромадли (2 – 4 млн сўмгача) гуруҳлар учун инфляциянинг сезиларли пасайишига сабаб бўлди.
5 млн сўмдан юқори даромад қилувчи аҳоли учун ноозиқ-овқат маҳсулотлари инфляцияси 13,3 фоиз бўлди. Бу ўтган ойга нисбатан 2,6 фоизга кўпроқдир. Уларга озиқ-овқат инфляцияси 7,9 фоиз бўлган бўлса, хизматлар соҳасида бу кўрсаткич 7,1 фоиз бўлган.
2 млн сўмгача даромад қилувчи аҳоли 14,5 фоизлик озиқ-овқат инфляциясига учраган. Бу эса март ойига нисбатан 1,2 фоизга камдир. Уларда ноозиқ-овқат ва хизматлар соҳасида инфляция мос равишда 8,3 фоиз ва 6,5 фоиз бўлган.
Шу тариқа 2 млн сўмгача маош олувчилар 5 млн сўмдан юқори ойлик оладиган аҳолига нисбатан озиқ-овқат инфляциясини қарийб 2 баробар кўпроқ сезган
Ташқи омиллар, логистика ва импорт билан боғлиқ масалалар ҳисобига барча даромад гуруҳларида ноозиқ-овқат товарлари нархи юқорироқ шаклланди.
Апрель ойида ижтимоий товарлар нархлари ўсиши ўтган ойга нисбатан (йиллик ҳисобда) 11,8 фоизгача секинлашган бўлиб, бунда, умумий инфляция билан фарқ 1,4 фоизгача қисқарди.
Шу ўринда, ижтимоий товарлар нархларининг ўсиши секинлашишини ўсимлик ёғлари (кунгабоқар ва пахта ёғи), картошка ва тухум нархларининг йиллик ҳисобда пасайиши билан изоҳлаш мумкин.
Аввалроқ Ўзбекистонда апрель ойида нархлар қандай ўзгаргани ҳақида хабар берилган эди.
Изоҳ (0)