КХДР ҳукумати безгак (иситма) тарқалиши фонида дорихоналарга дори-дармонлар етказиб беришни йўлга қўйиш учун ҳарбийларни сафарбар этади. Тегишли фармон мамлакат раҳбари Ким Чен Ин томонидан Корея Меҳнат партияси сиёсий бюросининг шошилинч мажлисида берилган, деб ёзади «РБК» Корея Марказий телеграф агентлигига таяниб.
Шимолий Корея ҳукумати мамлакатда мавжуд дори захираларини тақсимлашни топширган, бироқ йиғилишда етакчи улар, шу жумладан, дорихоналар орқали одамларга ўз вақтида етиб бормаётганини таъкидлаган.
Мамлакат раҳбари армияни сафарбар этиб, «зудлик билан» Пхеньянга дорилар етказиб беришни йўлга қўйишни буюрди.
Ким Чен Ин вазирларни ва миллий соғлиқни сақлаш соҳасини ишга масъулиятсиз ёндашгани учун танқид қилди ва уларнинг ташкилотчилик қобилиятларини салбий баҳолади. У дорихона пунктлари тегишлича таъминланмаганига эътибор қаратди. Хусусан, КХДР раҳбарига дорихоналарда дори-дармонларни сақлаш учун витриналардан бошқа жой ва хоналар йўқлиги туфайли улар ўз функциясини узлуксиз бажара олмаслиги, сотувчиларнинг эса ҳимоя кийимлари йўқлиги маъқул келмаган.
Айни вақтда Жанубий Корея КХДРга коронавирус авж олишига қарши курашишда исталган зарурий ёрдамни беришга тайёрлигини билдирди. «Агар Шимолий Корея рози бўлса, биз ҳеч қандай зарурий ёрдамни аямаймиз, хоҳ бу дори-дармонлар, шу жумладан, COVID-19 га қарши вакциналар, тиббий ускуналар вах оҳ тиббий ходимлар бўлсин», — деди республика президенти Юн Сок Ёл Миллий ассамблея қаршисида нутқ сўзлаётиб.
КХДРда ўтган бир кеча-кундузда иситма симптомларига эга 402,9 минг киши аниқланган. Апрель охиридан 15 майга қадар касалланганларнинг умумий сони 1,2 миллион нафарни ташкил қилган. Бир суткада 152 минг киши соғайган, саккиз киши вафот этган. Ўлим ҳолатларининг жами сони 50 тага етган.
Корея Марказий телеграф агентлиги маълумотларига кўра, «номаълум безгак» мамлакатда апрель охирида тарқала бошлаган. Шимолий Корея етакчиси Ким Чен Ин уни КХДР тарихидаги «буюк изтироб» деб атади.
КХДР ҳукумати COVID-19 авж олгани ҳақида 12 май куни эълон қилди. Ўша кунгача пандемия бошидан буён мамлакатда расман касалланганлар бўлмаган.
Шимолий Корея мамлакатда коронавирус тарқалишига йўл қўймаслик мақсадида 2020 йил баҳоридан ўз чегараларини ёпиб қўйганди. Хитой билан товар айланмаси аҳамиятли тарзда камайган, шу билан бирга барча юклар мажбурий тартибда карантинга жўнатиларди.
КХДР вакцинация даражаси деярли нолга тенг. Мамлакат ҳукумати Cоvах дастури доирасида халқаро кўмакдан ва бепул вакциналардан воз кечган, чунки давлатга кириб келадиган хорижлик мутахассислар инфекция олиб киришидан хавфсираган.
КХДРга қўшни Хитойда икки йил давомида касалланиш ҳолатлари деярли кузатилмаган бўлса, 2022 йил баҳорида у ерда ҳам катта кўламда авж ола бошлади.
Изоҳ (0)