Финляндия президенти Путинга қўнғироқ қилиб, мамлакат НАТОга қўшилиш учун ариза беришини маълум қилди

Финляндия президенти Саули Ниинистё Россия президенти Владимир Путинга қўнғироқ қилиб, мамлакат келаси бир неча кун ичида НАТОга аъзо бўлиш учун ариза беришини маълум қилди, деб ёзади Meduza Финляндия раҳбари матбуот хизматига таяниб.

Суҳбат чоғида Ниинистё Россиянинг сўнгги ойлардаги хатти-ҳаракатлари Финляндиянинг ўз хавфсизлиги юзасидан хавотирини оширганини айтди, шу муносабат билан альянсга қўшилиш жараёнини бошлаш ҳақида қарор қабул қилинган. Шу билан бирга, Финляндия президенти қайд этишича, унинг мамлакати Россия билан «сиполик ва профессионаллик доирасида» аҳил қўшничилик алоқаларини ўрнатишда давом этади.

Кремль матбуот хизмати ёзишича, Путин суҳбат чоғида Финляндия хавфсизлигига ҳеч қандай таҳдидлар йўқлигини таъкидлади ва «ҳарбий бетарафликка асосланган анъанавий сиёсатдан воз кечиш хатолик бўлишини» айтди. Путин Ниинистёни уларнинг НАТОга қўшилиши икки томонлама алоқаларга салбий таъсир қилиши мумкинлиги ҳақида огоҳлантирди.

Кейинроқ Финляндия ташқи ишлар вазири Пекка Хаависто мамлакатнинг НАТОдаги доимий вакили альянсга қўшилиш учун аризани 18 май, чоршанба куни бериши эҳтимолини маълум қилди.

Россия Украинага бостириб кирганидан сўнг Финляндия аҳолиси орасида НАТОга қўшилиш ғоясини қўллаб-қувватлаш даражаси ўнлаб баробар ошиб кетди (шу пайтгача у бир неча фоизга тенг эди).

Финляндия ва Россия қуруқликда қарийб 1200 километрлик умумий чегарага эга.

Финляндия билан биргаликда Швеция ҳам НАТОга аъзо бўлиш учун ариза бериши кутилмоқда.

Чехия ва Хорватия Финлайндия ва Швециянинг НАТОга қўшилишини қўллаб-қувватлади. Германия ташқи ишлар вазирлиги уларни НАТОга тезликда қабул қилишга чақирди. Туркия ташқи ишлар вазири эса турк халқи Швеция ва Финляндиянинг НАТОга киришига қарши эканини айтди.