Ким Чен Ин КХДРда бошланган коронавирус эпидемиясини мамлакат тарихидаги «буюк изтироб» деб атади. Икки ҳафта ичида у ерда 500 минг киши касалланган

КХДР етакчиси Ким Чен Ин мамлакатда коронавирус авж олишини «буюк изтироб» деб атади. Бу ҳақда Yonhap хабар бермоқда.

Сиёсий бюро аъзолари қаршисида нутқ сўзлар экан, Ким Чен Ин коронавирус — КХДРнинг бутун тарихи давомида унинг олдида турган энг катта синов эканини таъкидлади. У касалликка қарши курашда «илғор мамлакатлар», биринчи навбатда, Хитой тажрибасини ўрганиб чиқишга чақирди.

Расмий маълумотларга қараганда, 13 май кунининг ўзидаёқ 26 миллион аҳолига эга мамлакатда 174 минг киши касалликка чалинган. Апрель охиридан буён Шимолий Кореяда жами қарийб 524 минг киши касалланган.

КХДР ҳукумати COVID-19 авж олгани ҳақида 12 май куни эълон қилди. Ўша кунгача пандемия бошидан буён мамлакатда расман касалланганлар бўлмаган.

Шимолий Корея мамлакатда коронавирус тарқалишига йўл қўймаслик мақсадида 2020 йил баҳоридан ўз чегараларини ёпиб қўйганди. Хитой билан товар айланмаси аҳамиятли тарзда камайган, шу билан бирга барча юклар мажбурий тартибда карантинга жўнатиларди.

КХДР вакцинация даражаси деярли нолга тенг. Мамлакат ҳукумати Cоvах дастури доирасида халқаро кўмакдан ва бепул вакциналардан воз кечган, чунки давлатга кириб келадиган хорижлик мутахассислар инфекция олиб киришидан хавфсираган.

КХДРга қўшни Хитойда икки йил давомида касалланиш ҳолатлари деярли кузатилмаган бўлса, 2022 йил баҳорида у ерда ҳам катта кўламда авж ола бошлади.