Бирлашган Араб Амирликлари президенти ва Абу-Даби амири Халифа ибн Зайд ал-Наҳаён узоқ давом этган касалликдан сўнг 73 ёшида вафот этди. Бу ҳақда WAM агентлигига таяниб, «РБК» хабар бермоқда.
«Президент ишлари бўйича вазирлик БАА президенти жанобий олийлари шайх Халифа ибн Зайд ал-Наҳаённинг вафоти муносабати билан БАА халқига, араб ва ислом халқига ва бутун дунёга ҳамдардлик изҳор этади», — дейилади хабарда.
Мамлакатда 40 кунлик мотам эълон қилинди, у бугун, 13 майдан бошланади. Барча амирликлар бўйлаб байроқлар туширилади, расмий муассасалар иши эса тўхтатилади. Хусусий сектор фаолияти уч кунга тўхтатилади.
2014 йилда давлат раҳбари инсультни ва жиддий операцияни бошидан кечирган. Шундан кейин у омма олдида камдан кам намоён бўлган.
Сўнгги йилларда БАА президенти давлат ишлари билан деярли шуғулланмасди, мамлакатни бошқаришни пойтахт амирлиги Абу-Даби валиаҳд шаҳзодаси Муҳаммад ибн Зайдга топшириб қўйганди.
У БАА асосчиси Зайд ал-Наҳаённинг тўнғич ўғли эди.
Халифа ибн Зайд ал-Наҳаён 2004 йил ноябрида БАА президентига айланган, ушбу лавозимда у ўзининг вафот этган отаси шайх Зайд ибн Султон ал-Наҳаён ўрнини эгаллаган.
Изоҳ (0)